2023 jyldyń qańtar aıynan bastap bala kútimi boıynsha járdemaqy tóleý merzimi uzartyldy

ALMATY. QazAqparat – 2023 jyldan bastap bala kútimine baılanysty tólemder bala bir jarym jasqa tolǵanǵa deıin tólenedi. Bul týraly Almaty qalasynyń Eńbek jáne áleýmettik qorǵaý departamenti basshysynyń orynbasary Asqar Aımaǵambetov Óńirlik kommýnıkatsııalar qyzmetiniń brıfınginde málimdedi, dep habarlaıdy QazAqparat tilshisi.

Spıker Memleket basshysy 2022 jylǵy qyrkúıekte Qazaqstan halqyna Joldaýynda bala kútimi boıynsha járdemaqy tóleý merzimin ulǵaıtýdy tapsyrǵanyn eske saldy.

«Buryn bala bir jasqa tolǵanǵa deıin bala kútimi boıynsha járdemaqy tólenetin. Endi 2023 jylǵy qańtardan bastap Qazaqstanda bala kútimi boıynsha járdemaqy tóleý merzimi bala 1,5 jasqa tolǵanǵa deıin uzartyldy. Ol mynalardy quraıdy: birinshi balaǵa – 19 872 tg (5,76 AEK), ekinshi balaǵa – 23 495 tg (6,81 AEK), úshinshi balaǵa – 27 083 tg (7,85 AEK), tórtinshi jáne odan da kóp balaǵa – 30 705 tg (8,9 AEK). Jumys isteıtin analar bala kútimine baılanysty úıinde otyryp tabysynan aıyrylǵan jaǵdaıda, tólenetin aı saıynǵy áleýmettik tólem memlekettik áleýmettik saqtandyrý qorynan 1,5 jylǵa deıin uzartylady. Sondaı-aq onyń mólsheri bala týǵanǵa deıingi sońǵy 24 aıda áleýmettik aýdarymdar júrgizilgen ortasha aılyq tabystyń 40%-yn quraıdy», - dedi Asqar Aımaǵambetov.

Sondaı-aq onyń málimetinshe birinshi, ekinshi jáne úshinshi bala týǵan kezde 131 100 tg (38 AEK); tórtinshi jáne odan da kóp balaǵa 217 350 tg (63 AEK) tólenedi. Al eger egiz (úshem jáne t.b.) týǵan jaǵdaıda birjolǵy týý járdemaqysy ár balaǵa tólenedi jáne onyń mólsheri týý tártibine baılanysty.

Múgedek balalardy tárbıelep otyrǵan ata-analar, qamqorshylarǵa memlekettik járdemaqy kúnkóris deńgeıi mólsherinen 1,4 kóleminde tólenedi. 2023 jylǵy qańtardan bastap bul járdemaqynyń mólsheri 56 794 teńgeni quraıdy.

«I toptaǵy bala kezinen, ıaǵnı, 18 jastan asqan múgedektigi bar adamǵa kútim jasaıtyn adamdarǵa beriletin járdemaqy 2023 jylǵy qańtardan bastap 56 794 teńgeni quraıdy. «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan kópbalaly analarǵa beriletin járdemaqy mólsheri 22 080 teńgeni (6,4 AEK) qurady», - dedi spıker.

Sondaı-aq Asqar Aımaǵambetov ózimen birge turatyn tórt jáne odan da kóp kámeletke tolmaǵan balalary bar kópbalaly otbasylarǵa 2023 jylǵy qańtardan bastap taǵaıyndalǵan járdemaqy mólsherin aıtty. ıAǵnı, tórt balaǵa – 55 304 tg (16,03 AEK), bes balaǵa – 69 138 tg (20,04), alty balaǵa – 82 973 tg (24,05), jeti balaǵa – 96 807 tg (28,06) segizinshi jáne odan da kóp balaǵa – ár balaǵa 13 800 teńgeden – 4 AEK bolady.