2023 jyldyń І toqsanynda energetıka sektoryndaǵy qazaqstandyq qamtý úlesi 832 mlrd teńgeni qurady

ASTANA. QazAqparat – 2023 jyldyń 1-toqsanynda energetıkalyq sektordaǵy qazaqstandyq qamtý úlesi 832 mlrd teńgeni qurady. Bul týraly búgin Úkimet otyrysynda Energetıka mınıstri Almasadam Sátqalıev aıtty, dep habarlaıdy QazAqparat tilshisi.

«Ótken jyldyń qorytyndysy boıynsha energetıkalyq sektordyń jer qoınaýyn paıdalanýshylarynyń taýarlaryn, jumystary men kórsetiletin qyzmetterin satyp alýdyń jalpy kólemi 5,7 trln teńgeni qurady. Satyp alý kóleminiń 77 paıyzy iri munaı-gaz jobalarynyń operatorlaryna; «Samuryq-Qazyna» qorynyń kompanııalar tobyna 12 paıyz, qalǵan jer qoınaýyn paıdalanýshylarǵa 11 paıyzy tıesili. Ótken jyly qazaqstandyq qamtý úlesiniń ortasha salalyq kórsetkishi 3,4 trln teńge somaǵa 59,74 paıyzdy qurady. Onyń ishinde taýarlar – 27,3, jumystar – 77, kórsetiletin qyzmetter – 50,2 paıyz. Bıylǵy jyldyń 1 toqsanynyń qorytyndysy boıynsha taýarlardy, jumystar men kórsetiletin qyzmetterdi satyp alýdyń jalpy kólemi 1,5 trln teńgeni, qazaqstandyq qamtý úlesiniń ortasha salalyq kórsetkishi 832,24 mlrd teńge somasyna 55,97 paıyzdy qurady», - dedi mınıstr.

Osy rette ol iri jobalardaǵy taýarlardaǵy qazaqstandyq qamtý úlesin ulǵaıtý maqsatynda Munaı-gaz mashına jasaýdy damytýdyń halyqaralyq ortalyǵy qurylǵanyn atap ótti.

«Ortalyq 123 otandyq óndirýshilerdi aralap, shamamen 400 mln AQSh dollary somasyna barlyq iri jobalarda uzaq merzimdi perspektıvada suranysqa ıe ónimniń 7 taýar tobyn anyqtady. Bul 7 taýar toby iri operatorlardyń barlyq satyp alýlarynyń 40 paıyzyn quraıdy. Qosymsha bıyl mynadaı 5 taýar toby anyqtaldy: tıeý-túsirý jabdyqtary men materıaldary, jylý almastyrǵyshtar jylý almasý jabdyqtary, órtke qarsy jabdyqtar, hımııalyq zattar maılar boıaýlar, oqshaýlaǵysh jáne otqa tózimdi materıaldar», - dedi ol.

Mınıstrdiń sózine qaraǵanda ortalyq óndiristerdi oqshaýlaý jáne tehnologııalar transferti boıynsha halyqaralyq munaı-gaz jabdyqtaryn óndirýshilermen kelissózder júrgizip jatyr.

«Atap aıtqanda, álemdik jabdyq óndirýshilerimen 16 memorandým men kelisimge qol qoıyldy, Honeywell (AQSh), PetrolValves (Italııa), Sigma Solutions, Emerson (AQSh) kompanııasymen gaz detektorlaryn, jarylystan qorǵalǵan oryndaýdy basqarý júıeleriniń shkaftaryn, elektr taratý qoraptary men sorǵylaryn, sondaı-aq qysym datchıkterin shyǵarý boıynsha 4 jańa óndiris iske qosyldy. Bul baǵyttaǵy jumys jalǵasýda», - dedi Almasadam Sátqalıev.