2023 jyldyń І toqsanynda eldegi barlyq JEO men elektr jelileriniń aýdıti aıaqtalady

QOSTANAI. QazAqparat – 2023 jyldyń І toqsanynda eldegi barlyq JEO men elektr jelileriniń aýdıti aıaqtalady. Bul týraly Energetıka vıtse-mınıstri Jandos Nurmaǵanbetov Qostanaı oblysyna jumys sapary barysynda aıtty, dep habarlaıdy QazAqparat mınıstrlik saıtyna silteme jasap.

Oblystaǵy elektr energııasynyń negizgi kózi – Rýdnyı JEO-sy, ol 267 MVt-qa teń. Elektr energııasynyń jetispeıtin kólemi Ekibastuz-Pavlodar energokesheninen (Aqsý q. «EEK» AQ) jáne Petropavl qalasynan («Sevkazenergo» AQ) jetkiziledi. Vıtse-mınıstrdiń aıtýynsha, 2023 jyly Qostanaı qalasynda «Batys» kishi stantsııasyn paıdalanýǵa berý josparlanyp otyr. Jobany iske asyrý nátıjesinde 150 myńnan astam turǵyn sapaly jáne úzdiksiz elektrmen qamtylady.

Atalyp ótkenindeı, mınıstrlik jaǵdaıdy turaqtandyrý úshin qajetti sharalardy, sondaı-aq eldegi jylýmen jabdyqtaý jaǵdaıyn jaqsartý úshin júıeli sharalardy qabyldap jatyr.

Memleket basshysynyń tapsyrmasy boıynsha 2023 jyldyń 1 toqsanynda elimizdiń barlyq JEO jáne elektr jelileriniń aýdıti aıaqtalady. QR Energetıka mınıstrligi eldiń elektr stantsııalary men jelilerine tehnıkalyq aýdıt júrgizý boıynsha jumysty Dúnıejúzilik Banktiń granttyq kómegi sheńberinde bastady. Tehnıkalyq aýdıtti júrgizý qorytyndylary boıynsha salanyń aǵymdaǵy jaı-kúıine taldaý júrgiziledi, onyń negizinde energııa únemdeýge jáne energııa tıimdiligine, sondaı-aq qajetti ınvestıtsııalar kólemine baǵyttalǵan jańǵyrtý men rekonstrýktsııalaýdy júrgizý úshin qajetti tehnıkalyq usynymdar daıyndalady.

Naryq sýbektilerin yntalandyrý úshin qýattardy rekonstrýktsııalaýǵa jáne jańǵyrtýǵa ınvestıtsııalar baǵyttalady, «Tarıfti ınvestıtsııalarǵa aıyrbastaý» jańa baǵdarlamasy ázirlenip jatyr.

2023 jyly «Jylý energetıkasy týraly» zań qabyldanady. Zań óńirlerdi jylýmen jabdyqtaý problemalaryn sheshýge baǵyttalǵan, uzaq merzimdi josparlardy júzege asyrýǵa jáne ortalyq jáne jergilikti atqarýshy organdar arasyndaǵy ózara qarym-qatynastardy júıeleýge múmkindik beredi.

Energetıkalyq qadaǵalaý komıtetiniń sapaly jóndeý kampanııalaryn qamtamasyz etýdi jáne ınvestıtsııalyq baǵdarlamalardyń oryndalýyn baqylaý salasyndaǵy rólin kúsheıtý josparlanyp otyr.