2023 jyldan bastap aýyl halqyna mıkrokredıt berile bastaıdy
«Jambyl oblysynyń úlgisinde aýyl halqynyń tabysyn arttyrý boıynsha pılottyq jobany keńinen taratý jospary bar. Atalǵan is-shara 2025 jylǵa deıingi agroónerkásiptik keshendi damytý jónindegi ulttyq jobada kórinis tapty. Ulttyq joba sheńberinde 2023 jyldan bastap aýyl halqyna mıkrokredıt berýdi berýdi josparlap otyrmyz. Ol úshin 30 mlrd teńge somasynda qarjylandyrý kólemi kózdelgen. Jalpy ulttyq jobada aýyl halqynyń tabysyn arttyrý boıynsha pılottyq jobanyń aýqymyn keńeıtýge 90 mlrd teńgeni baǵyttaý kózdelgen», - dedi Erbol Qarashókeev ortalyq kommýnıkatsııalar qyzmeti alańynda ótken baspasóz máslıhatynda.
Mınıstr aıtqandaı, óńir ákimdikteriniń aqparatyna sáıkes ulttyq joba boıynsha belgilengen qarjylandyrý kólemi jetkiliksiz.
«Pılottyq jobanyń aýqymyn keńeıtý úshin 2024 jyly 12 myńnan astam aýyl turǵynyna 74,6 mlrd teńge kóleminde mıkrokredıt, al 2025 jyly shamamen 76,7 mlrd teńgeni mıkrokredıt berý josparlanyp otyr. Búginde bizdiń mınıstrlik ákimdikter málimdegen qajettilikke sáıkes qarjylandyrýdyń tolyq kólemin bólýge bıýdjettik ótinim daıyndady. Respýblıkalyq bıýdjet komıssııasynyń sheshimimen bul kólem 2023 jylǵa tolyq, 2024 jáne 2025 jyldarǵa ishinara qoldaý tapty», - deıdi ol.
Sondaı-aq, vedomstvo basshysy atalǵan pılottyq jobanyń aıasyn keńeıtý maqsatynda 2023-2025 jyldarǵa arnalǵan jol kartasy bekitilgenin aıtty.
«Bıyl shildede QR Eńbek jáne halyqty áleýmettik qorǵaý mınıstriniń buıryǵymen kásipkerlik bastamashylyqqa járdemdesý jónindegi sharalardy uıymdastyrý jáne qarjylandyrý qaǵıdalary bekitildi», - dedi E. Qarashókeev.