2023 jyly jer qoınaýyn paıdalanýshylardan 10,6 trln teńge salyq túsken

<p>ASTANA. KAZINFORM - 2023 jyldyń qorytyndysy boıynsha jer qoınaýyn paıdalanýshylardyń elimizdiń shoǵyrlandyrylǵan bıýdjetine salyqtyq túsimderi 10,6 trln teńgeni qurady.</p>

QR Memlekettik kirister komıtetiniń baspasóz qyzmetiniń habarlaýynsha, salyq baqylaýynda 5 183 jer qoınaýyn paıdalanýshy bar, olardyń salyq túsimderi respýblıkalyq bıýdjettiń 35 paıyzyn jáne Ulttyq qordyń 100 paıyzyn qamtamasyz etedi.

2023 jylǵy salyqtyq baqylaý nátıjeleri boıynsha jer qoınaýyn paıdalanýshylardan 561 mlrd teńge óndirildi.

Budan basqa, 2023 jylǵy 1 qańtardan bastap óndiriletin metaldarǵa paıdaly qazbalardy óndirý salyǵynyń stavkalaryn ulǵaıtý nátıjesinde bıýdjetke shamamen 160 mlrd teńge tústi.

Qazirgi ýaqytta tabıǵı rentany ádil alý maqsatynda elimizde óndiriletin basqa da qatty paıdaly qazbalardyń álemdik baǵalary men konıýnktýrasyna taldaý júrgizilýde.

Sondaı-aq transferttik baǵa belgileýdi, kapıtaldy shyǵarýdy baqylaý sharalaryn kúsheıtý sheńberinde Ekonomıkalyq yntymaqtastyq jáne damý uıymynyń (EYDU) sarapshylary qoldaǵan transferttik baǵa belgileý týraly Zańǵa túzetýler ázirlendi.

Atalǵan túzetýler álemdik jáne otandyq tájirıbeni eskere otyryp ázirlendi jáne halyqaralyq iskerlik operatsııalarda memlekettiń shyǵyndaryn boldyrmaýǵa baǵyttalǵan.

Zań jobasy Parlament Májilisinde talqylanyp jatyr.

«Sondaı-aq, 2023 jyly EYDU sarapshylary is-saparmen keldi, olar Qazaqstannyń halyqaralyq jáne ishki quqyqtyq bazasy aqparatpen jumys isteý kezinde qupııalylyq talaptarynyń saqtalýyna jetkilikti kepildik beretinin atap ótti»,-delingen QR QM Memlekettik kirister komıtetiniń baspasóz qyzmeti taratqan aqparatta.