2023 jyly jalpy ishki ónim 5,1 paıyzǵa ósti
«Jedel derekter boıynsha 2023 jyly jalpy ishki ónimniń ósýi 5,1 paıyzdy qurady. Bul maquldanǵan boljamdy mánnen 1,1 paıyzdyq tarmaqqa joǵary. Negizgi kózge túskenderi: óńdeý ónerkásibiniń ulǵaıǵany, qurylys salasyndaǵy jáne saýda-sattyqtaǵy jetistikter, kólik salasyndaǵy qyzmetterdiń kólemi óskeni, kóterme jáne bólshek saýdada satý qarqyny ulǵaıýy. Taǵy bir atap ótetin kórsetkish – ol negizgi kapıtalǵa ınvestıtsııalar kóleminiń artýy. Memlekettiń áleýmettik mindettemelerin oryndaýǵa arnalǵan shyǵystar tolyq kólemde oryndaldy. Yntymaqty zeınetaqy mólsheri 10,5 paıyzǵa ındeksteldi», - dedi ol.
Sonymen qatar onyń derginshe, eń tómengi kúnkóris deńgeıiniń ózgerýine baılanysty:
- eń tómengi bazalyq zeınetaqy mólsheri eń tómengi kúnkóris deńgeıi 54-ten 60 paıyzǵa deıin;
- ortaq zeınetaqyny esepteý úshin qabyldanatyn eń joǵary tabystyń shamasy 46-dan 55 aılyq eseptik kórsetkishke deıin ulǵaıtyldy.
«Ótken jyldyń qorytyndysy boıynsha 2,3 mln zeınetkerge zeınetaqy tólemderine bıýdjet shyǵystarynyń jalpy somasy – 3 313,9 mlrd teńge. Múgedektigi boıynsha jáne asyraýshysynan aırylý jaǵdaıy boıynsha memlekettik áleýmettik járdemaqylardyń mólsheri eki ret, 2023 jyldyń 1 qańtarynan 8,5 paıyzǵa, 2023 jylydń 1 shildesinen 14,5 paıyzǵa ósti. 2023 jylǵy 1 qańtardan bastap balalary bar otbasylarǵa beriletin barlyq memlekettik áleýmettik járdemaqylar 8,5 paıyzǵa artty. Inflıatsııa deńgeıi 9,8 paıyzdy qurady», - dedi vıtse-mınıstr.