2022 jyly Ulttyq qordan 550 mlrd teńge nysanaly transfert tartylmaq
«Kepildendirilgen transfertti 2022 jyly - 2,4 trıllıon teńge, 2023 jyly - 2,2 trıllıon teńge jáne 2024 jyly - 2 trıllıon teńge mólsherinde aıqyndap, áleýmettik mindettemelerdi qarjylandyrýǵa baǵyttaý usynylyp otyr. Osyny eskere otyryp, Ulttyq qordan 2022-2024 jyldarǵa arnalǵan kepildendirilgen transfert týraly zań jobasy ázirlenip, sizderge qaraýǵa engizilip otyr. Budan basqa, Ulttyq qordan 2022 jyly 550 mıllıard teńge mólsherinde, 2023-2024 jyldary jyl saıyn 400 mıllıard teńgeden nysanaly transfert tartý usynylady. Jalpy ishki ónimge baılanysty 2022 jyly bıýdjet tapshylyǵy 3,3 paıyz deńgeıinde boljansa, keleshekte 2024 jyly jalpy ishki ónimge qatysty 2,5 paıyzǵa deıin tómendeý boljanyp otyr», - dedi Á. Erǵalıev.
Onyń aıtýynsha, 2022 jyly munaıly emes tapshylyq jalpy ishki ónimge baılanysty 8,1 paıyzdy qurap, 2024 jyly jalpy ishki ónimge qatysty 6,3 paıyzǵa deıin tómendeıdi.
«Respýblıkalyq bıýdjettiń shyǵystary 2022 jyly 15,9 trıllıon teńge, 2023 jyly - 15,6 trıllıon teńge jáne 2024 jyly 16 trıllıon teńge kóleminde boljanyp otyr. Munaı baǵasy barreline 60 AQSh dollary bolǵan kezde munaı sektorynan Ulttyq qorǵa túsetin túsimder boljam boıynsha 2022 jyly 2,5 trıllıon teńgeden 2024 jyly 3 trıllıon teńgege deıin ósedi. Josparlanǵan transfertterdi eskere otyryp, boljam boıynsha Ulttyq qordyń valıýtalyq aktıvteri 2022 jyly 55,3 mıllıard AQSh dollarynan 2024 jyly 61,6 mıllıard AQSh dollaryna deıin ósedi», - dedi mınıstr.
«Elbasy strategııalyq bastamalaryna qol jetkizý, Memleket basshysynyń tapsyrmalaryn oryndaý, Nur Otan partııasynyń saılaý aldy baǵdarlamasyn iske asyrý maqsatynda, sondaı-aq jalpyulttyq basymdyqtarǵa sáıkes, elimizdiń 2022-2026 jyldarǵa arnalǵan áleýmettik-ekonomıkalyq damý boljamy ázirlendi. Halyqtyń ál-aýqatyn arttyrý maqsatynda ekonomıkanyń turaqty jáne sapaly ósýin qamtamasyz etý úshin orta merzimdi ekonomıkalyq saıasat aıasynda, kelesi sharalar qabyldanatyn bolady: makroekonomıkalyq kórsetkishterdi turaqtandyrý, jańa ınvestıtsııalyq tsıkldy qalyptastyrý, óńirlerdiń teńgerimdi damýy, ekonomıkany ártaraptandyrý, bıznes-ahýaldy jaqsartý, tsıfrlyq ekonomıka, adamı kapıtaldy jáne memlekettik basqarýdyń tıimdi júıesin damytý», - dedi Áset Erǵalıev.