2022 jyly memlekettik bıýdjetke 15 trln teńgeden astam kiris tústi – Qarjy mınıstri

ASTANA. QazAqparat – Ótken jyly el bıýdjetine 15 trln teńgeden astam qarjy túsip, jospar 104,4%-ǵa oryndalǵan. Bul týraly Premer-Mınıstrdiń orynbasary – Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Ótken jyly memlekettik bıýdjetke (transfertterdi esepke almaǵanda) 15 trln 668 mlrd teńge kóleminde kiris tústi. Osylaısha jospar 104,4%-ǵa oryndaldy. Kirister boıynsha jospar 309 mlrd teńgege artyǵymen oryndaldy. Onyń ishinde salyqtar 210 mlrd teńgege, salyqtyq emes túsim 94 mlrd teńgege artyǵymen oryndaldy. Salyqtar boıynsha negizgi asyra oryndaý somasy qosylǵan qun salyǵyna tıesili. Qosylǵan qun salyǵy boıynsha jospardyń asyra oryndalý faktorlary satý boıynsha aınalymnyń 29%-ke ósýi, 3-inshi elderden ımport kóleminiń 36%-ke nemese 7,4 mlrd dollarǵa ósýi», - dedi Erulan Jamaýbaev Úkimet otyrysynda.

Mınıstrdiń baıandaýynsha, kirister josparyn Mańǵystaý oblysynan basqa óńirler asyra oryndaǵan.

«Shıki munaıǵa arnalǵan eksporttyq keden bajy boıynsha jospar oryndalmaı qaldy. Oǵan sebep is júzinde qalyptasqan eksporttyq keden bajy mólsherlemesiniń boljamdy kórsetkishten 4%-ke tómendeýi. Jergilikti bıýdjet kirisi 107,3%-ke atqaryldy sáıkesinshe 5,2 trln teńgeni qurady. Jyldyq jospar 354 mlrd teńgege asyra oryndaldy», - deıdi ol.