2022 jyly kópbalaly otbasylarǵa 346,8 mlrd teńge járdemaqy tólendi
Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.
Baspasóz qyzmetiniń habarlaýynsha, bul memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady.
Tólem mólsheri bala sanyna qaraı eseptelip tólenedi. Kópbalaly otbasylardaǵy:
- 4 balasy bar otbasylarǵa – 16,03 AEK (2022 jyly – 50 976 teńge, 2023 jyly – 55 304 teńge);
- 5 balaǵa – 20,04 AEK (2022 jyly – 63 728 teńge, 2023 jyly – 69 138 teńge);
- 6 balaǵa – 24,05 AEK (2022 jyly – 76 479 teńge, 2023 jyly – 82 973 teńge);
- 7 balaǵa – 28,06 AEK (2022 jyly – 89 231 teńge, 2023 jyly – 96 807 teńge);
- 8 jáne odan da kóp balasy bar otbasylarǵa – ár balaǵa 4 AEK mólsherinde (2022 jyly – 12 720 teńgeden, 2023 jyly – 13 800 teńgeden).
«Kópbalaly otbasylarǵa olardyń tabysyn esepke almaı beriletin memlekettik járdemaqy Qazaqstanda 2020 jyldyń 1 qańtarynan bastap ataýly áleýmettik kómek kórsetýdiń jańa tetikterinde kózdelgen tabysy az jáne kópbalaly otbasylardy qoldaýdyń úsh negizgi baǵyty aıasynda engizilgenin eske sala keteıik.
2023 jylǵy 1 qańtardan bastap balaly otbasylarǵa taǵaıyndalatyn memlekettik járdemaqylardyń mólsheri 8,5%-ǵa artty»,-delingen habarlamada.