2022 jyly Qazaqstannyń barlyq oblysynda týrızm kórsetkishteri ósken

BÝRABAI. QazAqparat – Ótken jyly 8 mln qazaqstandyq el ishinde saıahattaǵan jáne árbir tórtinshi týrıst ulttyq parkterge barǵan, dep habarlaıdy QazAqparat tilshisi.

«Týrızm salasy pandemııadan keıin qalpyna kelip jatyr. Sońǵy 9 aıda qazaqstandyq ishki týrıster sany 6,5 mln boldy. 2022 jyldyń qorytyndysy – 8 mln shamasynda bolady dep otyrmyz. Bul bizdiń 2025 jylǵa qoıǵan kórsetkish bolǵan. Elimizdegi týrıst sany ósti, soǵan sáıkes jatyn oryn sany da ósýde. Jyl basynan beri 11 myń jatyn oryn nemese 5 myń qonaqúı nómirleri jańadan paıdalanýǵa berildi», - dedi Mádenıet jáne sport vıtse-mınıstri Erjan Erkinbaev týrızmdi damytý máseleleri jónindegi kóshpeli alqa otyrysynda.

Spıkerdiń aıtýynsha, Qazaqstannyń barlyq aımaǵynda týrızm kórsetkishteri ósken. Atyraý oblysynda ótken jyly týrıster sany 3 esege ósken, bul óńirdegi bıznes týrızmniń qalpyna kelgenin, damyp jatqanyn bildiredi.

«Eldegi árbir tórtinshi týrıstiń ulttyq parkterge barǵany qýantady. Ózderińiz bilesizder, respýblıkamyzda 14 ulttyq park tirkelgen, onda orman, muzdyqtar, kól men qum sekildi planetanyń barlyq ekojúıesi bar. Ótken jyly ulttyq parkterge 2 mln týrıst barǵan, bul absolıýttik rekord», - dedi E. Erkinbaev.

Aıta keteıik, Býrabaı kýrortynda QR Mádenıet jáne sport mınıstrliginiń týrızm salasyn damytýǵa arnalǵan keńeıtilgen alqa otyrysy ótip jatyr.