2022 jyly ınflıatsııalyq qysym joǵary bolyp qala beredi – Ulttyq bank
«Damyǵan jáne damýshy elder kópjyldyq eń joǵary kórsetkishterdiń jańarýyn tirkeýde. Bıylǵy qyrkúıekte AQSh-taǵy ınflıatsııa rekordtyq 5,4%-ke deıin, qazanda – Eýroodaq pen Reseı Federatsııasynda tıisinshe 4,1%-ke jáne 8,1%-ke deıin ósti. Qytaıda monetarlyq saıasat boıynsha sheshim qabyldaýda basty nazar aýdarylatyn óndirýshiler baǵasynyń ósýi bıylǵy qyrkúıekte 10,7% boldy», - dedi E. Dosaev Úkimet otyrysynda.
Halyqaralyq valıýta qorynyń baǵalaýy boıynsha, qysqa merzimdi kezeńde saqtalyp otyrǵan kútpegen ózgerister toqtaǵanda damyǵan jáne damýshy elderdegi ınflıatsııa 2022 jyldyń ortasyna qaraı qalypqa keledi. Olardyń baǵalaýynsha, suranys pen usynystyń uzaq teńgerimsizdigi, taýar jetkizýdegi irkilister jáne shıkizat pen azyq-túlik taýarlaryna baǵanyń ósýi kezinde ınflıatsııany turaqtandyrý 2024 jylǵa deıin sozylýy múmkin.
«Bıylǵy qazanda álemdik azyq-túlik baǵasy 10 jyldaǵy eń joǵary deńgeıge jetip, ósýin jalǵastyrdy. FAO ındeksi bir aıda 3,9%-ke ósip, ósimdik maıynyń, dándi daqyldar men sút ónimderiniń qymbattaýy esebinen 133,2 tarmaqqa jetti. Ulttyq banktiń baǵalaýy boıynsha, saqtalyp otyrǵan teńgerimsizdik pen údep kele jatqan ınflıatsııalyq kútýlerdi eskersek, 2022 jyly Qazaqstandy qosa alǵanda, damýshy elderde ınflıatsııalyq qysym joǵary bolyp qala beredi», - dedi E. Dosaev.