2022 jyly gazdandyrylǵan óńirlerdiń avtoparki gazǵa kóshpek

NUR-SULTAN. QazAqparat - QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine gaz jáne gazben jabdyqtaý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy birinshi oqylymda maquldady, dep habarlaıdy QazAqparat tilshisi.

«Búgingi kúni gazdy keńinen qoldanýdy yntalandyrý jáne gazdy tereń óńdeýge ınvestıtsııalar tartý maqsatynda gaz salasyn memlekettik retteýdiń jańa kezeńiniń qajettiligi týyndady. Halyqty turaqty gazben jabdyqtaý jáne odan ári gazdandyrý basymdyǵyn saqtaı otyryp, zań jobasynda ınvestıtsııalyq jobalardyń túrli jańa sanattary úshin jeke baǵa belgileý kózdelgen», - dedi zań jobasy boıynsha baıandama jasaǵan QR Energetıka birinshi vıtse-mınıstri Mahambet Dosmuhambetov.

Onyń dereginshe, eń aldymen memleket bekitetin baǵalar gazdyń ózindik qunynan edáýir tómen. Bul gaz salasyn damytýda tejeýshi faktor bolyp otyr. Ekinshi jaǵynan, osy kezeńde memlekettik retteýden bas tartý jáne naryqtyq baǵa belgileýge tolyq kóshý gaz baǵasynyń birden ósýine alyp keledi.

«Osyǵan baılanysty, munaı-gaz hımııasyn yntalandyrý maqsatynda mundaı jobalar úshin taýarlyq gazdyń baǵasyn belgileý tetigi mynadaı formýla boıynsha ázirlendi: gaz jetkizýdiń ózindik quny qosylǵan Ulttyq operator rentabeldiliginiń eń tómengi normasy 7 paıyz», - dedi birinshi vıtse-mınıstr.

Mahambet Dosmuhambetov qoldanyp júrgen otyn túrlerimen salystyrǵanda gazdyń otyn retinde birqatar artyqshylyǵy bar ekendigin aıtady.

«2018 jyly QR Úkimeti tabıǵı gazdy motor otyny retinde qoldanýdy damytý baǵdarlamasyn qabyldady. Ony iske asyrý ekologııalyq júktemeni tómendetýge, avtokólik quraldarynyń shyǵyndaryn azaıtýǵa, jańa jumys oryndaryn qurýǵa múmkindik beredi. 2022 jylǵa qaraı eldiń gazdandyrylǵan óńirlerinde mýnıtsıpaldyq avtoparkti syǵylǵan (komprımırlengen) gazǵa kóshirý josparlanýda. Avtoparktegi kólik sany - 12 myń birlik», - dedi ol.