2022 jyly EAEO elderinen Qazaqstanǵa ákelingen ımport quny 13 mlrd dollardan asty

ASTANA. QazAqparat – QR Premer-mınıstri Álıhan Smaıylov EAEO aıasyndaǵy taýar aınalymy boıynsha negizgi statıstıkalyq kórsetkishterdi jarııa etti, dep habarlaıdy QazAqparat tilshisi.

«Búgingi tańda Qazaqstan halyqaralyq saýdanyń tolyqqandy qatysýshysy bolyp otyr. 2015 jyldan bastap Dúnıejúzilik saýda uıymynyń, Eýrazııalyq ekonomıkalyq odaqtyń múshesi, sondaı-aq erkin saýda týraly birqatar ekijaqty jáne kópjaqty kelisimder jasasty. Tamaq ónimderi men azyq-túlik taýarlarynyń negizgi ımporty EAEO jáne TMD elderinen keledi. EAEO sheńberinde múshe memleketter ózara saýdada shekteýler men kedendik bajdardy qoldanbaıdy. TMD elderi arasyndaǵy saýda 2011 jylǵy TMD-nyń erkin saýda aımaǵy týraly shart sheńberinde ımporttyq baj salyǵynsyz júzege asyrylady», - delingen Álıhan Smaıylovtyń depýtattyq saýalynda berilgen jaýabynda.
Onyń aıtýynsha, Qazaqstanǵa OA jáne EAEO elderiniń aýmaǵynan ákelinetin ónimniń túpkilikti qunyna áser etetin kedendik shyǵyndar joq. Usynylǵan aqparatqa sáıkes, 2021 jyly 4,9 mln AQSh dollary somasyna mal jáne ósimdik ónimderi ımporttaldy, onyń 70,4%-y TMD elderinen kelgen.
2022 jylǵy qańtar-qyrkúıekte Qazaqstan men EAEO elderi arasyndaǵy taýar aınalymy 19,9 mlrd AQSh dollaryn qurady, bul ótken jyldyń sáıkes kezeńimen (18,9 mlrd AQSh dollary) salystyrǵanda 5,1% - ǵa joǵary.
2022 jylǵy qańtar-qyrkúıekte Qazaqstannan EAEO elderine jiberilgen eksport 14,3%-ǵa ósip, 6,5 mlrd AQSh dollaryn qurady. EAEO elderinen Qazaqstanǵa ákelingen ımport 2022 jylǵy qańtar-qyrkúıekte 1,2%-ǵa artyp, 13,3 mlrd AQSh dollaryna jetti.