2022 jyly barlyq deńgeıdegi ákimder halyqpen 28,3 myń kezdesý ótkizdi

ASTANA. QazAqparat – 2022 jyldyń ekinshi jartyjyldyǵynda ákimder halyqpen 20 myńǵa jýyq kezdesý ótkizdi. Bul týraly Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«2022 jyldyń 2 jartyjyldyǵynda ákimder halyqpen 19,8 myńǵa jýyq kezdesý ótkizdi. Olardyń barysynda turǵyndar áleýmettik jáne turǵyn úı-kommýnaldyq ınfraqurylym nysandaryn salý, ekologııa jaǵdaıy, joldardy jóndeý, jer máseleleri jáne taǵy basqa suraqtar boıynsha 33,4 myńnan astam másele kóterip, óz usynystaryn aıtty», - dedi Á.Qýantyrov.

Onyń aıtýynsha, kezdesýlerdiń nátıjesinde jergilikti atqarýshy organdar 33,1 myń máseleniń sheshimin tapty. Halyq kótergen problemalardy sheshý úshin jergilikti bıýdjetten 485 mlrd teńge qajet. Kerek qarjynyń 253,8 mlrd teńgesi nemese 52,3 paıyzy bólindi.

«Ákimdikter ortalyq atqarýshy organdar, ulttyq holdıngter jáne kompanııalar deńgeıinde sheshiletin máselelerdiń tizimin qalyptastyrdy. Bul tizim 62 máseleni qamtyp tur. Olardyń basym bóligi respýblıkalyq bıýdjetten qarajat bólýdi qajet etedi», - dedi mınıstr.

Osy oraıda ol atalǵan tizimde qamtylǵan taqyryptarǵa qatysty egjeı-tegjeıli taldaý jasaǵanyn aıtty.

«Óńirlerde kóterilgen 10 másele boıynsha qajetti qujattama daıyn emes. Taǵy 5 máseleni sheshýge respýblıkalyq bıýdjette 20,2 mlrd teńge qarastyrylǵan. 13 máselege qatysty 61,2 mlrd teńge somasynda qarajat bólý múmkindigi 2023 jylǵy respýblıkalyq bıýdjetti naqtylaý kezinde qaralatyn bolady. 14 máseleni sheshý boıynsha jumysty memlekettik organdar atqaryp jatyr. 18 máseleniń sheshimi jergilikti atqarýshy organdardyń quzyretinde. Sondyqtan, olarǵa ortalyq memlekettik organdardan qoldaý kórsetilmedi. Budan bólek, 2 másele boıynsha memlekettik organdar tıisti sheshim jasady», - dedi Á. Qýantyrov.

Taldaý nátıjesinde, ortalyq memlekettik organdar deńgeıinde sheshýdi talap etetin 6 másele iriktelip alyndy.

Sonymen qatar, 2022 jyldyń birinshi jartyjyldyǵynyń qorytyndysy boıynsha ortalyq deńgeıde sheshýdi talap etetin 14 másele anyqtaldy. Onyń ishinde beseýiniń sheshimi oryndalyp, 6 máselege qatysty memlekettik organdar qoldamady. Sheshimi uzaq merzimdi talap etetin 3 másele qarastyrylyp jatyr.

«Jalpy, 2022 jyldyń qorytyndysy boıynsha barlyq deńgeıdegi ákimder halyqpen 28,3 myń kezdesý ótkizdi. Onda 63 myń máseleniń basy ashylyp, 47,6 myńy sheshimin tapty. Bul kórsetkishin 75,5 paıyzdy qurady», - dedi mınıstr.

Óńirlerde kóterilgen máselelerdi sheshý boıynsha joǵary kórsetkish kelesi oblystarda baıqaldy:

- Aqtóbe oblysy – 94,7%;

- Qostanaı oblysy – 93%;

- Almaty qalasy – 92,8%.

Al tómengi kórsetkishter:

- Almaty oblysynda. Bunda máselelerdiń tek 28,5% ǵana sheshildi;

- Batys-Qazaqstan oblysynda. Suraqtardyń 50,5% sheshildi;

- Atyraý oblysynda. Munda máselelerdiń 54,5% sheshildi.

Budan buryn habarlanǵandaı, Úkimette ortalyq organdar basshylarynyń halyqpen kezdesý qorytyndylary jarııalandy.