2022 jyly avtobýs júrgizýshileri kinásinen 382 jol apaty boldy
«2022 jyly avtobýs júrgizýshileriniń kinásinen 382 jol-kólik apaty bolyp, 37 adam kóz jumdy, 639 adam jaraqattandy. Onyń ishinde apattyń 70%-dan astamy (275) turaqty tasymaldaý marshrýttarynda bolǵan. Jolaýshylar kólikteriniń jol apatyna ushyraýyn qysqartý jáne jolaýshylardy tasymaldaý qaǵıdalarynyń saqtalýyn baqylaýdy kúsheıtý úshin jyl saıyn «Avtobýs» respýblıkalyq jedel-profılaktıkalyq is-sharasy ótedi», - dep jazylǵan R. Sklıardyń depýtat saýalyna jaýabynda.
Profılaktıkalyq sharada qoǵamdyq kólik júrgizýshileriniń 65 myńnan astam ereje buzý jaǵdaıy, onyń ishinde mas kúıinde avtobýs aıdaý, jolaýshylardy zańsyz tasymaldaý, kólik quraldaryn zańsyz qaıta jabdyqtaý, olardy basqarý kezinde uıaly telefondardy paıdalaný jáne t.b. faktiler anyqtaldy.
Avtobýs parkteriniń, onyń ishinde halyqaralyq jáne qalaaralyq tasymaldardy júzege asyratyn kompanııalardyń 600-den astam laýazymdy tulǵasy ákimshilik jaýapqa tartyldy. 200-den astam ruqsat etilmegen turaqtar jumysy, 410 josyqsyz tehnıkalyq baıqaý operatorlarynyń qyzmeti toqtatyldy, aıyppul salýmen 270 ákimshilik materıaldar rásimdeldi.
«Qazirgi ýaqytta 466 myńnan astam adam jolaýshylar kóligin júrgizý quqyǵyna ıe («D» sanatyndaǵy júrgizýshi kýáligi). Elde tirkelgen 62,5 myń avtobýs bar. Demek, osy sanattaǵy júrgizýshilerdiń jetispeýiniń problemalyq máseleleri joq. Óz kezeginde, Іshki ister mınıstrligi halyqqa qyzmet kórsetý deńgeıin jáne júrgizýshi quramynyń sapasyn arttyrý úshin kásipkerlerge qajet bolǵan jaǵdaıda júrgizýshilerdiń jumys rejımi, olardyń eńbek jaǵdaılary, jalaqy deńgeıin arttyrý máselelerin qaıta qaraýdy usynady», - deıdi R. Sklıar.