2022 jyly 6,7 mln qazaqstandyqtyń tabysy ósedi

NUR-SULTAN. QazAqparat - 2022 jylǵy 1 qańtardan bastap eń tómengi kúnkóris deńgeıi men aılyq eseptik kórsetkish mólsheriniń artýy memlekettik bıýdjetten zeınetaqy men járdemaqy alatyn 5,1 mln adam kirisiniń ósýine ákeledi, al eń tómengi jalaqynyń (ETJ) ulǵaıýy ekonomıkanyń barlyq salalarynda jumys isteıtin 1,6 mln adam kirisiniń ósýin qamtamasyz etedi, dep habarlaıdy QazAqparat.

«Azamattardy qoldaý úshin memlekettik bıýdjetten júzege asyrylatyn áleýmettik tólemderdiń mólsherin belgileý úshin Qazaqstanda eń tómengi kúnkóris jáne aılyq eseptik kórsetkish qoldanylady. Eń tómengi kúnkóris deńgeıi men aılyq eseptik kórsetkish mólsheri ınflıatsııanyń boljamdy deńgeıin eskere otyryp, jyl saıyn belgilenedi. Osylaısha, Úkimet halyqtyń ómir súrý deńgeıiniń tómendeýin boldyrmaý úshin turaqty sharalar qabyldaýda. Máselen, 2020 jyly eldegi epıdemıologııalyq jaǵdaıǵa baılanysty ETK men AEK mólsheri eki ret, jalpy alǵanda 10%-ǵa ulǵaıtyldy. Bıyl olar 5% ındeksatsııalanyp, ETK jáne AEK mólsheri tıisinshe 34 302 teńge jáne 2 917 teńgeni qurady», - delingen Eńbek mınıstrligi málimetinde.

Aıta keteıik, 2022 jylǵy 1 qańtardan bastap eń tómengi kúnkóris deńgeıiniń shamasyn jáne aılyq eseptik kórsetkishti 5%-ǵa ındeksatsııalaý josparlanyp otyr. Nátıjesinde, ETK mólsheri 36 018 teńgeni, al AEK – 3 063 teńgeni quraıdy.