2022 jylǵy Azııa oıyndary keıinge qaldyryldy
13:09, 08 Mamyr 2022
NUR-SULTAN. QazAqparat - 2022 jylǵy Azııa oıyndary keıinge qaldyryldy, dep habarlaıdy QazAqparat tilshisi.
Azııa oıyndary bıyl 10-25 qyrkúıek aralyǵynda Qytaıdyń Hanchjoý qalasynda ótkizilýi josparlanǵan edi.
Azııa oıyndaryn keıinge qaldyrý jónindegi sheshim Ózbekstan astanasy Tashkent qalasynda ótken Azııa Olımpıadalyq keńesi atqarý komıtetiniń otyrysynda qabyldandy.
«Hanchjoýdaǵy Azııa oıyndarynyń uıymdastyrý komıteti jahandyq problemalarǵa qaramastan, josparlanǵan ýaqytta oıyndardy ótkizýge óte jaqsy daıyndaldy. Joǵarydaǵy sheshim pandemııa jaǵdaıy men oıyn aýqymyn muqııat qarastyrǵannan keıin qabyldandy. Azııa oıyndarynyń ataýy men emblemasy ózgerissiz qalady», - delingen Azııa Olımpıadalyq Keńesiniń habarlamasynda.
Eske salsaq, budan buryn kógaldaǵy hokkeıden Qazaqstan quramasy Azııa oıyndarynyń irikteý kezeńine qatysatyny habarlandy.