2022 jylǵy 1 qańtardan gaz jelisi uıymdaryn akkredıtteý ınstıtýty kúshin joıady
«2020 jylǵy jeltoqsan aıynda «Qazaqstan Respýblıkasynyń keıbir zańnamalyq aktilerine Memleket basshysynyń 2020 jylǵy 1 qyrkúıektegi «Qazaqstan jańa naqty ahýalda: is-qımyl ýaqyty» atty Qazaqstan halqyna Joldaýynyń jekelegen erejelerin iske asyrý máselesi boıynsha ózgerister men tolyqtyrýlar engizý týraly» Zań qabyldandy. Onyń aıasynda 2022 jylǵy 1 qańtardan bastap gaz jelisi uıymdaryn akkredıtteý ınstıtýtynyń kúshin joıa otyryp, suıytylǵan munaı gazyn (budan ári – SMG) elektrondyq saýda alańdaryna (budan ári – ESA) kezeń-kezeńimen ótkizý týraly tıisti túzetýler engizilgen. Sondaı-aq jáne ESA arqyly jetkizý úshin málimdeletin SMG úlesiniń mólsherin kelisý boıynsha Básekelestikti qorǵaý jáne damytý agenttiginiń (budan ári – Agenttik) quzyreti kózdelgen», - delingen Úkimet basshysy orynbasarynyń jaýabynda.
Onyń atap ótýinshe, qoldanystaǵy tetikten SMG-ni ESA arqyly tolyq iske asyrýǵa kóshý naryqtyń barlyq qatysýshylary úshin tikeleı óndirýshilerden SMG kólemderin satyp alýǵa teń jáne kemsitpeıtin jaǵdaılar jasaýdy qamtamasyz etýge múmkindik beredi. Bul básekelestikti damytýǵa yqpal etedi, naryqqa tıimsiz deldaldardyń áserin qysqartýǵa múmkindik beredi. Sondaı-aq, shaǵyn orta bıznesti damytý úshin qolaıly jaǵdaılar jasaıdy.
«Osy jylǵy qarashada SMG-ny ESA arqyly ótkizýdiń jalpy kóleminiń úlesi 70 paıyzdy qurady. ESA-dan tys ótkiziletin SMG-ǵa Energetıka mınıstrligi toqsan saıyn bekitetin kóterme shekti baǵa (2021 jylǵy 4 toqsanǵa baǵa qosylǵan qunǵa salynatyn salyqsyz tonnasyna 38 701 teńge deńgeıinde bekitildi) boıynsha beriledi. Óz kezeginde, ESA arqyly ótkiziletin SMG baǵasy suranys pen usynys negizinde qalyptasady. Bul rette, búgingi kúni SMG ishki naryǵyn qamtamasyz etý jáne baǵa belgileý tetigin jetildirý jónindegi barlyq qajetti sharalar qabyldanyp jatqanyn habarlaımyz. Osylaısha, «Elektrondyq saýda alańdary arqyly suıytylǵan munaı gazy saýda-sattyǵyn uıymdastyrý jáne ótkizý qaǵıdalaryn bekitý týraly «Energetıka mınıstriniń 2018 jylǵy 6 jeltoqsandaǵy № 481 buıryǵyna ózgerister men tolyqtyrýlar engizý týraly» buıryǵynyń jobasy ázirlendi», - dedi Roman Sklıar.