2022 jyldyń sońyna qaraı ınflıatsııa 16-18% aralyǵynda bolady – Ulttyq bank

NUR-SULTAN. QazAqparat – 2022 jyldyń sońyna qaraı ınflıatsııa 16-18% aralyǵynda qalyptasady. Bul týraly QR Ulttyq bankiniń Aqsha-kredıt saıasaty departamenti dırektorynyń orynbasary Denıs Chernıavskııdiń túsindirmesinde aıtylǵan, dep habarlaıdy QazAqparat.

Baıandamada boljamnyń alǵysharttary, bazalyq jáne boljamnyń balamaly stsenarııler boıynsha makroekonomıkalyq jaǵdaıdyń damý perspektıvalary, qazirgi makroekonomıkalyq jaǵdaılar berilgen. Sonymen birge qujatta aqsha, valıýta jáne qarjy naryqtaryndaǵy jaǵdaıǵa taldaý jasalǵan.

Ótken boljamdy raýndtyń qorytyndysy boıynsha, jarııalanǵan ınflıatsııaǵa qatysty aldyńǵy baǵalaý kóterilý jaǵyna qaraı birshama qaıta qaraldy. 2022 jyldyń sońyna qaraı ınflıatsııa 16-18% aralyǵynda qalyptasady.

Qysqa merzimdi kezeńde ınflıatsııa 2023 jylǵy aqpanda óziniń eń joǵary mánine jetip, eki tańbaly bolyp qalady. Bul birqatar azyq-túlik ónimderiniń, sondaı-aq azyq-túlikke jatpaıtyn taýarlardyń, birinshi kezekte, joǵary ımporttyq quramdas bóligi bar azyq-túlikke jatpaıtyn taýarlardyń jalǵasyp otyrǵan baǵasynyń ósýin, sondaı-aq saqtalyp otyrǵan joǵary bazalyq ınflıatsııany bildiretin bolady.

Budan ári 2023 jyldyń qorytyndysy boıynsha, ınflıatsııa 7,5-9,5%-ǵa deıin birtindep baıaýlaıdy degen boljam bar. Tómendeý úrdisi kúsheıe beredi, sóıtip, 2024 jyldyń sońyna qaraı ınflıatsııa 5,5-7,5% deńgeıinde bolady dep boljanyp otyr.

Ulttyq banktiń boljamdaryna sáıkes, Qazaqstandaǵy ekonomıkalyq belsendilik dınamıkasy 2022 jyly 2,5%-3,5% dálizinde bolady. 2023 jyly belgisizdiktiń jalpy deńgeıiniń tómendeýi aıasynda Qazaqstan ekonomıkasynyń ósýi 4%-5% deıin jedeldeıdi. Іshki suranys fıskaldyq yntalandyrýmen qoldaý kórsetiletin ekonomıkalyq belsendiliktiń jetekshisi bolady. Sondaı-aq, elde munaı óndirý kólemi ulǵaııý múmkindigine baılanysty eksport JІÓ ósiminiń qosymsha faktory bolady.

Aldyńǵy boljamdy raýndpen salystyrǵanda, ınflıatsııanyń jedeldeý táýekelderi birshama tómendedi, alaıda, álemde geosaıası shıelenis saqtalýy sebebinen joǵary bolyp qalyp otyr.

«Álemdegi kúrdeli geosaıası jaǵdaı Qazaqstannyń makroekonomıkalyq kórsetkishteri boljamdarynyń alǵysharttaryna joǵary belgisizdik engizýdi jalǵastyrýda. Bul ınflıatsııanyń boljamdyq mánderinen aýytqý táýekelderin joǵary deńgeıde saqtaýǵa sebepshi bolady»,-delingen habarlamada.

Aıta keteıik, osyǵan deıin Qazaqstanda jyldyq ınflıatsııa 16% asyp ketkeni habarlanǵan bolatyn.

Foto: nationalbank.kz