2022 jyldyń birinshi toqsanynda ınflıatsııa sharyqtaýy múmkin – Ulttyq bank
«Baǵa ósiminiń aǵymdaǵy serpinin eskere otyryp, Ulttyq Bank ınflıatsııanyń 2021 jyldyń qorytyndylary boıynsha 8,5-8,7% sheginde qalyptasatynyn kútýde. Úkimet pen jergilikti atqarýshy organdar Inflıatsııaǵa qarsy den qoıý sharalary keshenin odan ári tıimdi iske asyrǵan kezde ınflıatsııa boljamdy dıapazonnyń tómengi shegine jaqyn qalyptasady», - dep jazylǵan Ulttyq banktiń bazalyq mólsherleme týraly túsindirmesinde.
Bank ókilderi azyq-túlikke jatpaıtyn taýarlar men qyzmetterdiń qysqa merzimdi ınflıatsııasy jyl sońyna deıin saqtalatynyn boljap otyr.
«Aqyly qyzmetter qunynyń qalypty ósýi boljanady. Ol turǵyn úı-kommýnaldyq qyzmetter naryǵyndaǵy qazirgi baǵanyń saqtalýyna negizdeletdi. Syrtqy ınflıatsııalyq ortanyń saqtalýy, azyq-túlikke jatpaıtyn naryqtardaǵy ınflıatsııalyq protsesterdiń qarqyn alýy, tutyný belsendiliginiń qalpyna kelýi, joǵary ınflıatsııalyq kútýler jáne taýarlar men qyzmetterdiń ózindik qunynyń ósýi arqyly janar-jaǵar maı baǵasy ósýiniń janama áseri baǵalarǵa qatty qysym kórsetedi. Kómir baǵasynyń yqtımal ósimi aıasynda elektr energııasy tarıfteriniń budan bylaıǵy ósý táýekeli bar. 2022 jylǵy birinshi toqsanda ınflıatsııanyń eń joǵary shegi kútiledi. Sodan keıin onyń birtindep báseńdeıtini baıqalady», -dep jazylǵan Ulttyq bank aqparatynda.
Degenmen qarjy retteýshisi ınflıatsııaǵa qarsy den qoıý sharalary óz jemisin berip, 2022 jyly ınflıatsııanyń deńgeıi 6,0-6,5%-ǵa deıin birtindep baıaýlaıtynyn boljap otyr.
«Inflıatsııanyń tómendeýin 2021 jyly qalyptasqan joǵary baza ustap turady. Sonymen birge, taýarlar men qyzmetterdiń jekelegen naryqtaryndaǵy teńgerimsizdikke, jahandyq jáne jergilikti jetkizilim tizbeginiń toptap qalýyna jáne joǵary ınflıatsııalyq kútýlerdiń saqtalýyna baılanysty proınflıatsııalyq táýekelderdi iske asyrý 2022 jylǵy ınflıatsııanyń boljamdy máninen joǵary qalyptasýyna alyp kelýi múmkin.
Ulttyq Bank kelesi sheshimin ınflıatsııalyq kútýlerdiń serpinin, ınflıatsııanyń ornyqty quramdas bólikterin, sondaı-aq epıdemıologııalyq ahýaldyń syrtqy jáne ishki suranysqa áserin eskere otyryp qabyldaıdy. Kútýlerdiń, ınflıatsııanyń jáne onyń ornyqty quramdas bólikteriniń turaqsyz baıaýlaýy kezinde Ulttyq Bank monetarlyq talaptardy barynsha kúsheıtýdi jalǵastyrady», - delingen Ulttyq bank málimetinde.