2022 jyl biz úshin túbegeıli ózgerister jyly boldy - Máýlen Áshimbaev

ASTANA. QazAqparat – 2022 jyl biz úshin túbegeıli ózgerister jyly boldy desek, artyq bola qoımas. Áleýmettik jelidegi paraqshasynda osylaı dep oı túıgen Senat spıkeri Máýlen Áshimbaev 2023 jyl elimiz úshin tabysty, berekeli, qutty jyl bolatynyna senetinin jetkizdi, dep habarlaıdy QazAqparat.

Barshańyzdy kelip jetken jańa 2023 jylmen shyn júrekten quttyqtaımyn! Bul – bárimizge kóterińki kóńil-kúı syılaıtyn, árqaısymyz erekshe qarsy alatyn shattyqqa toly mereke, -

dep jazǵan Senat tóraǵasy.

Osy sátte ótkendi oı elegine salyp, aldaǵy kúnderden aıryqsha úmit kútetinimizge toqtalady.

Ótip bara jatqan 2022 jyl elimiz úshin ońaı bastalǵan joq. Qasiretti qańtar oqıǵasy eldigimiz ben egemendigimizge úlken qaýip tóndirdi. Biz, shyn máninde, táýelsizdik jylnamasynda buryn-sońdy bolmaǵan syn-qatermen betpe-bet keldik. Degenmen, Memleket basshysy Qasym-Jomart Kemeluly Toqaevtyń batyl sheshimderi men halyqtyń yntymaǵynyń arqasynda qıyndyqtardy eńsere bildik. Táýelsizdigimizdi nyǵaıtyp, memlekettiligimizdi saqtaý jolynda naqty qadamdar jasadyq. Sonyń nátıjesinde búginde elimizde keshendi reformalar júıeli túrde iske asyrylyp jatyr. Jalpy, 2022 jyl biz úshin túbegeıli ózgerister jyly boldy desek, artyq bola qoımas, -

deıdi ol.

Senat spıkeri aldaǵy ýaqytta qolǵa alǵan bastamalar laıyqty jalǵasatynyna senimdilik tanytady.

2023 jyl elimiz úshin tabysty, berekeli, qutty jyl bolady dep senemiz. Ol úshin barlyq iste judyryqtaı jumylyp áreket etý asa mańyzdy. Sonda ǵana kózdegen maqsat-mindetterimizge qol jetkizemiz. Jańa jylda ár otbasyna qýanysh, jaqsylyq, amandyq tileımin! Egemen elimiz ósip-órkendeı bersin! Árdaıym irgemiz bútin, birligimiz bekem bolsyn! Jańa jyldaryńyzben! -

dep tilek bildiredi Máýlen Áshimbaev.

Foto: senate.parlam.kz