2021 jyly sý shyǵyny 273 mln tekshe metrge azaıdy
«Memleket basshysynyń tapsyrmasyna sáıkes, transshekaralyq aǵynǵa táýeldilikti azaıtý jáne sýarmaly jerlerdi qalpyna keltirýdi qamtamasyz etý úshin sý sharýashylyǵy ınfraqurylymyn salý, qaıta jańartý, sýarý kanaldaryn tsıfrlandyrý boıynsha jumys júrgizilýde. Sý basý qaýpin joıý jáne qaýipsiz paıdalanýdy qamtamasyz etý maqsatynda avarııalyq sý qoımalary men gıdrotehnıkalyq qurylystardy rekonstrýktsııalaý júrgiziledi. Qazirgi tańda 16 gıdrotehnıkalyq qurylystary qaıta jańartyldy. Onyń ishinde 2021 jyly Almaty, Shyǵys Qazaqstan, Qyzylorda jáne Túrkistan oblystarynda ornalasqan 4 nysan qalpyna keltirildi», - dedi ol mınıstrliktiń alqa májilisinde.
Vıtse-mınıstrdiń dereginshe, 9 jańa sý qoımasyn salý aıasynda ótken jyly Túrkistan oblysyndaǵy «Keńsaı-Qosqorǵan-2» sý qoımasy paıdalanýǵa berildi. Qalǵandary boıynsha tehnıkalyq-ekonomıkalyq negizdemeler men jobalaý-smetalyq qujattamalar ázirlenýde.
Respýblıkalyq bıýdjet jáne halyqaralyq qarjy uıymdarynyń qaryzdary esebinen 1 050 shaqyrym sýarý kanaldary qaıta jańartyldy. Bul 78 myń gektardy qalpyna keltirýge jáne 13 myń gektar sýarmaly jerdi sýmen qamtamasyz etýdi jaqsartýǵa múmkindik berdi. Budan basqa, 2021 jyly kanaldardaǵy 6 myńǵa jýyq gıdrotehnıkalyq qurylystar qaıta jańartyldy jáne tik drenajdyń 95 uńǵymasy qalpyna keltirildi. 16 kanal tsıfrlandyryldy. Nátıjesinde sý shyǵyny 273 mln tekshe metrge azaıdy», - dedi Serik Qojanııazov.