2021 jyly qazaqstandyq JOO-lar óz úlgisindegi dıplomdar beredi

NUR-SULTAN. QazAqparat – 2021 jyldan bastap Qazaqstandaǵy joǵary oqý oryndary óz úlgisindegi dıplomdar berip, sapa jaýapkershiligin kóteredi, dep habarlaıdy QazAqparat tilshisi.

Bul týraly QR Bilim jáne ǵylym vıtse-mınıstri Mıras Dáýlenov Ortalyq kommýnıkatsııalar qyzmetindegi brıfıngte aıtty.

«Qazirgi ýaqytta Qazaqstannyń joǵary bilim berý júıesinde 128 JOO bar, onyń 56-sy memlekettik, 72-si – jekemenshik. Sonymen birge, bilim berý sapasyn arttyrý kezinde menshik nysanyna asa mán bermeı otyrǵanymyzdy aıtqym keledi. Osyǵan baılanysty joǵary oqý oryndarynyń akademııalyq derbestigi keńeıip jatyr. «100 naqty qadamnyń» 78 qadamyn oryndaý úshin 2018 jyly JOO akademııalyq derbestigin keńeıtetin zań qabyldandy. Osy Zań arqyly JOO-larǵa ózderiniń bilim berý baǵdarlamalaryn qurýǵa, oqytýshylarǵa qoıylatyn biliktilik talaptaryn anyqtaýǵa múmkindik berildi», - dep atap ótti vıtse-mınıstr.

Nátıjesinde joǵary oqý oryndarynyń akademııalyq derbestigi 85% deıin keńeıtildi. QR BǴM Bilim berý baǵdarlamalary tiziliminde JOO-lar 99 baǵdarlama tirkedi.

«Osy zań arqyly zańǵa táýeldi aktiler deńgeıinde júıeli ózgerister qabyldandy. JOO-lar usynatyn bilim sapasy úshin jaýapkershilik alý maqsatynda JOO-lardyń akademııalyq derbestigi keńeıtildi. Odan bólek, JOO-lar 2021 jyldan bastap óz úlgisindegi dıplomdardy beretin bolady», - deıdi Mıras Dáýlenov.