2021 jyly Qazaqstandaǵy týrızm salasyna 564 mlrd teńge ınvestıtsııa tústi
«Búgingi tańda týrızmdi damytý eldiń áleýmettik-ekonomıkalyq damýynda mańyzdy oryn alatyny belgili. Ol jaı ǵana ekonomıkanyń damýy ǵana emes, halyqtyń tabysyn arttyrýdyń negizgi baǵyttarynyń biri, óıtkeni bul sala jumys oryndarymen de tikeleı baılanysty. Sondyqtan bizdiń elimizdiń resýrstary týrızmniń barlyq túrlerin damytýǵa múmkindik beredi dep oılaımyz», - dedi E. Toǵjanov QR Mádenıet jáne sport mınıstrliginiń Týrızm salasy boıynsha alqa májilisinde.
Onyń aıtýynsha, búginde durys uıymdastyrylǵan memlekettik saıasat pen týrıstik qaýymdastyqtyqtyń úılesimdi ózara is-qımyly arqasynda salaly júıeli damý qamtamasyz etilip keledi.
«Onyń bári ońaı bolǵan joq, pandemııaǵa baılanysty talaı kedergiler de boldy. Bul baǵytta áli de naqty jumystar júrgizýge týra keledi. Degenmen josparlanǵan biraz dúnıe júzege asyrylǵanyn ózderińiz bilesizder. Nátıjesinde 2021 jyly týrızm salasyndaǵy negizgi kapıtalǵa salynǵan ınvestıtsııa kólemi 564 mlrd teńgeni qurady. Muny qıyn kezeńderdi eskerek bolsaq, basqa memlekettermen salystyryp qarasaq, jaqsy kórsetkish dep aıtýǵa bolady, ári qaraı bul baǵytty birge damytýymyz kerek», - dedi Premer-Mınıstr orynbasary.
Sonymen birge, spıker ótken jyly týrızm salasynda qabyldanǵan zańnamalyq ózgerister salanyń eń mańyzdy aspektilerin qozǵaıtyn, buryn-sońdy bolmaǵan memlekettik qoldaý sharalarymen qamtamasyz etilgenin eske saldy.
«Parlament qabyrǵasynda da talaı usynystar aıtylyp, talqylanǵan bolatyn. Ol jerde aıtylǵan 7-8 naqty usynystar boldy, olardyń bári zańdy negizde qoldanyldy. Budan basqa, týrıstik salanyń ınvestıtsııalyq ahýalyn jaqsartý aıasynda týrızm salasyndaǵy ınvestıtsııalyq bastamany basym baǵyttaǵy joba dep taný shegi 2 mln aılyq eseptik kórsetkishten 200 myń AEK-ke deıin tómendetilgen bolatyn. Bul ınvestıtsııalyq jobalardy preferentsııalaý múmkindigin keńeıtti», - dedi Eraly Toǵjanov.