2021 jyly Qazaqstanda munaı óndirý kólemi 86 mln tonnaǵa deıin jetýi múmkin

NUR-SULTAN. QazAqparat – 2021 jyly Qazaqstanda munaı óndirý kólemi 86 mln tonnaǵa deıin ulǵaıtylýy múmkin. Bul týraly QR Energetıka mınıstrliginiń alqa májilisinde vedomstvo basshysy Nurlan Noǵaev aıtty, dep habarlaıdy QazAqparat tilshisi.

«Pandemııa saldarynan biraz zardap shekken munaı ónerkásibiniń negizgi kórsetkishterine toqtalatyn bolsam, 2020 jyldyń qorytyndysy boıynsha munaı jáne kondensat óndirý kólemi 85,7 mln tonnaǵa jetti. 2021 jyldyń qańtar aıynda qoldanylǵan shekteýlerdi (-17%) eskere otyryp, eń pessımıstik stsenarıı boıynsha 2021 jylǵa arnalǵan boljamdy óndirý kólemi – 83,4 mln tonna. Bul rette búgingi tańda álemdik munaı naryǵy men munaıdyń baǵa belgilenimderiniń birte-birte qalpyna kelý úrdisi baıqalýda. 86 mln tonna jospardy oryndaý kútilýde», - dedi mınıstr.

Onyń aıtýynsha, 2020 jyldyń qorytyndysy boıynsha munaı eksporty 68,5 mln tonnany qurady. 2021 jylǵa arnalǵan jospar- 67,5 mln tonna.

«Munaı óńdeý kólemi 2020 jyldyń qorytyndysy boıynsha 15,8 mln tonnaǵa jetti. 2021 jylǵa arnalǵan jospar – 17 mln tonna. Munaı ónimderin óndirý kólemi 2020 jyldyń qorytyndysy boıynsha 11,8 mln tonnaǵa jetti. 2021 jylǵa arnalǵan jospar- 12,4 mln tonna», - dedi N. Noǵaev.