2021 jyly elordada memqyzmet 100% elektrondy túrde kórsetilmek

NUR-SULTAN. QazAqparat – Kelesi jyly elordada kórsetiletin memlekettik qyzmet tolyqtaı elektrondy túrge kóshpek. Bul týraly Nur-Sultan qalasy Jumyspen qamtý jáne áleýmettik qorǵaý basqarmasynyń basshysy Sáýle Nurǵojına málim etti, dep habarlaıdy QazAqparat tilshisi.

«Jyl basynan beri elordada 221 168 memlekettik qyzmet kórsetildi. Sonyń ishinde elektrondy túrde qyzmet kórsetý 83 paıyzǵa artyp otyr, ótken jyly bul kórsetkish 70 paıyzdy quraǵan bolatyn. ıAǵnı 19 memlekettik qyzmettiń 14-i elektrondy túrde kórsetilýde. 2021 jyly elordada memlekettik qyzmetti 100 paıyz elektrondy túrde qoljetimdi etý maqsaty tur», - dedi Sáýle Nurǵojına Nur-Sultan qalalyq máslıhatynyń otyrysynda jasaǵan baıandamasynda.

Onyń aıtýynsha, búginde Nur-Sultanda 167 myń adam áleýmettik qoldaýǵa muqtaj.

«Olardyń qatarynda az qamtylǵan otbasylar, múgedek jandar, soǵys ardargerleri men zeınetkerler bar. Búginde atalǵan toptaǵy azamattarǵa qarjylaı tólemaqy men tegin qyzmetter kórsetilip keledi. Sondaı-aq memlekettik merekeler men aıtýly kúnder qarsańynda elordalyq 130 myń áleýmettik qoldaýǵa muqtaj jan bir rettik qarjylaı tólemaqy aldy. Odan bólek, 28 myń múgedek jandy áleýmettik qoldaý maqsatynda 3,4 mlrd teńge qarjy bólindi, onyń 82 paıyzy jergilikti bıýdjetten qarastyryldy. Sonymen qatar 2020 jyly bas qalada 15,7 myń adam saýyqtyrý sharalarymen qamtyldy», - deıdi ol.

Aıta ketsek, búgin elordalyq máslıhatta Nur-Sultan qalasyndaǵy halyqtyń áleýmettik osal toptaryn (az qamtylǵan otbasylar, múgedekter, kópbalaly otbasylar, jetim balalar) qoldaý jáne ońaltýǵa arnalǵan sharalar qaraldy.