2021 jyly BQO-da 95 aýylda uıaly baılanys ornatylady

NUR-SULTAN. QazAqparat – Batys Qazaqstan oblysynyń ákimi Ǵalı Esqalıev óńirdegi ınternetpen qamtamasyz etý sharalaryn aıtyp berdi, dep habarlaıdy QazAqparat.

Ákimniń aıtýynsha, Prezıdent tapsyrmasy aıasynda óńirde 250-den astam turǵyny bar 68 aýylda mobıldi ınternet júrgizilgen.

«Búgingi tańda oblys halqynyń 96%-y mobıldi baılanyspen qamtamasyz etilgen. Degenmen, uıaly baılanys pen ınternettiń sapasy máselesi áli de bar. 2021 jyly uıaly baılanysy joq halqy az 95 aýyldy uıaly baılanyspen qamtamasyz etý máselesin sheshýdi josparlap otyrmyz», - dedi Ǵalı Esqalıev Ortalyq kommýnıkatsııalar qyzmetinde ótken baspasóz máslıhatynda.

Sonymen birge, 86 aýylda mobıldi ınternettiń jyldamdyǵy men sapasyn arttyrý josparlanǵan.

«Ótken jyly memlekettik qyzmetterdiń 95% elektrondy túrde kórsetilgen. Óńirlik IT-Hub kómegimen «109», «112» jobalary, stopcovid.kz saıty júzege asty, olar pandemııa kezinde kóp kómektesti. Qazir «Smart Aqsai» jobasy ázirlenýde, onda zamanaýı beınekameralar, jaryqtandyrý aspaptaryn ornatý, derekter bazasyn ıntegratsııalaý jáne t.b. josparlanýda. Polıtsııa departamentiniń jedel basqarý ortalyǵy men oblys mektepterindegi beınebaqylaý júıesin ortalyqtandyrýdy josparlap otyrmyz», - dedi BQO ákimi.