2021 jyly 480 aýyl jańǵyrtylady – Úkimet basshysy

NUR-SULTAN. QazAqparat – 2021 jyly 480 aýyl jańǵyrtylady. Bul týraly QR Premer-Mınıstri Asqar Mamın aıtty, dep habarlaıdy QazAqparat tilshisi.

«Aýyldyq jerlerde turmys sapasyn jaqsartý maqsatynda «Aýyl – El besigi» jobasy aıasynda 2021 jyly 480 aýyl jańǵyrtylady. 106 mlrd teńgege 1 140 joba iske asyrylady», - dedi Premer-Mınıstr Úkimettiń keńeıtilgen otyrysynda.

Asqar Mamınniń atap ótýinshe, jobalardyń basym bóligi Túrkistan, Jambyl, Shyǵys Qazaqstan, Qyzylorda, Aqmola jáne Soltústik Qazaqstan oblystarynda josparlanyp otyr.

Aıta keteıik, Memleket basshysy Qasym-Jomart Toqaevtyń tóraǵalymen Úkimettiń keńeıtilgen otyrysy bastaldy. Beınebaılanys rejıminde ótip jatqan otyrysta Mınıstrler kabınetiniń barlyq músheleri, oblystardyń, respýblıkalyq mańyzy bar Nur-Sultan, Almaty, Shymkent qalalarynyń ákimderi qatysýda. Jıyn barysynda elimizdiń bıylǵy jartyjyldyqtaǵy áleýmettik-ekonomıkalyq damýy qorytyndylanbaq. Sondaı-aq Qazaqstan Prezıdenti pandemııadan keıingi kezeńdegi ekonomıkany damytýdyń mindetterin belgilep beredi dep kútilýde.