2021 jyldyń qorytyndysy boıynsha elimizdegi jumyssyzdyqqa boljam jasaldy

NUR-SULTAN. QazAqparat – 2021 jyldyń qorytyndysynda elimizdegi jumyssyzdyq deńgeıi 4,9 paıyz bolýy múmkin. Bul týraly «Eńbek resýrstaryn damytý ortalyǵy» AQ prezıdenti Dáýlet Arǵyndyqov aıtty, dep habarlaıdy QazAqparat tilshisi.

«Ótken jyldyń qorytyndysy jumyssyzdyq deńgeıiniń 4,9 paıyz bolǵandyǵyn kórsetip otyr. Pandemııaǵa, ádistemege baılanysty máselelerdiń týyndaǵanyn, kóp adam ýaqytsha jumyssyz qalǵanyn túsinemiz. Qazir Qudaıǵa shúkir, jaǵdaı turaqtalyp kele jatyr. Osy jyly júzege asyrylýy kózdelgen josparlar da jumyssyzdyq deńgeıin 4,9 paıyz mólsherinde ustap turýǵa múmkindik beredi. Bul Jumyspen qamtý jol kartasymen, «Eńbek» memlekettik baǵdarlamasyn jáne osy jyly da qarastyrylyp otyrǵan ózge de salalyq baǵdarlamalardy júzege asyrýmen baılanysty», - dedi Dáýlet Arǵyndyqov Ortalyq kommýnıkatsııalar qyzmetindegi baspasóz máslıhaty barysynda.

Aıta keteıik, elimizdegi jumys kúshiniń sany 9,2 mln adamdy quraıdy. Onyń ishinde jaldamaly jumysta 6,7 mln adam eńbek etedi. Ózin ózi jumyspen qamtyǵandar sany - 2 mln adam. Al jumyssyzdar sany - 449 myń adam.