2021 jyldan bastap memqyzmetshilerdiń shetel bankterinde esepshot ashýyna shekteý qoıylady

NUR-SULTAN. QazAqparat – 2021 jyldan bastap memlekettik qyzmetshilerdiń shetel bankterinde esepshoty bolýyna shekteý engizý kerek. Bul týraly búgin Qazaqstan halqyna Joldaýyn jarııa etken QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Kvazımemlekettik qurylymdardyń qarjy-sharýashylyq qyzmetin, bıýdjet qarajatyn paıdalaný jónindegi málimetterdi jáne basqa da qundy derekterdi búkil qoǵamǵa qoljetimdi etý jónindegi biryńǵaı aqparattyq resýrs jasaý asa mańyzdy bolyp otyr. Memlekettik organdardyń sheshimi jónindegi aqparattyń ashyqtyǵy azamattyq qoǵammen syndarly dıalog ornatýǵa septigin tıgizedi. Aqparatqa qol jetkizý jónindegi zań jobasyn múmkindiginshe osy sessııanyń aıaǵyna deıin qabyldaý kerek», - dedi Memleket basshysy.

Sonymen qatar QR Prezıdenti sybaılas jemqorlyqqa qarsy kúrestiń jańa tásilderin engizgen jón dep sanaıtynyn basa aıtty.

«2021 jyldan bastap memlekettik qyzmetshilerdiń, depýtattardyń, sýdıalardyń shetel bankterinde esepshotqa ıe bolýy, qolma qol aqsha jáne baǵaly zattar saqtaýyna qatysty jemqorlyqpen kúres aıasynda jańa shekteýler engizý kerek», - dedi Qasym-Jomart Toqaev.