2021 sport sektsııasyn ashýǵa 6 mlrd teńge jumsaldy
«Byltyr sport sektsııalaryn jan basyna shaqqandaǵy qarjylandyrý ınstıtýty engizildi. Mundaı memlekettik is-shara elimizde alǵash ret qabyldanyp otyr. Sonyń arqasynda ótken jyly 162 myńnan astam bala men jasóspirim sport sektsııalaryna tegin qatysty. Respýblıka boıynsha sport sektsııalaryn ashýǵa bólingen qarjy 6 mlrd teńgeden asty», - dedi Dáýren Abaev mınıstrliktiń alqa otyrysynda.
Onyń atap ótýinshe, memlekettik bilim berý uıymdarynyń muǵalimderine sabaqtan tys sporttyq dárister júrgizgeni úshin bazalyq laýazymdyq jalaqydan 100 paıyz mólsherinde qosymsha aqy tóleý júıesi engizildi. Dene shynyqtyrý jáne sport salasyndaǵy mamandandyrylǵan mektep pen kolledj qyzmetkerleriniń jalaqysy 25 paıyz ósti. Sondaı-aq, olardyń aılyǵy 2023 jylǵa deıin jyl saıyn kóbeıtilip, 2023 jylǵa qaraı bul ósim 100 paıyzdy quraıdy.
«Sportshylardyń dopıngke qarsy zerthanasy men Ulttyq dopıngke qarsy ortalyqtyń, dene shynyqtyrý jáne sport boıynsha respýblıkalyq oqý-ádistemelik jáne taldaý ortalyǵynyń basqarýshy jáne negizgi personaldarynyń jalaqy mólsheri laýazymdyq jalaqydan 100 paıyz artty. Bilim berýdiń barlyq deńgeıindegi dene shynyqtyrý sabaqtarynda «Qazaq kúresi», «Toǵyzqumalaq» jáne «Asyq atý» ulttyq sport túrleri mindetti komponent retinde engizildi»,- dedi ol.