2020 jyly jyldyq ınflıatsııa 7,5 paıyzdy qurady
«Ótken jyl pandemııa saldarynan týyndaǵan jahandyq ekonomıkalyq daǵdaryspen erekshelendi. Bul rette, Úkimet elimizdiń ekonomıkasynyń turaqtylyǵyn qamtamasyz etýge, halyqtyń ómir súrý sapasy men deńgeıin, ál-aýqatyn saqtap qalýǵa, memlekettiń halyqtyń aldyndaǵy áleýmettik mindettemelerin tolyǵymen oryndaýǵa, sonymen birge, elimizdegi sanıtarlyq-epıdemıologııalyq ahýaldy turaqtandyrýǵa baǵyttalǵan naqty sharalardy qabyldady. Der kezinde qabyldaǵan sharalar Qazaqstan ekonomıkasynyń tómendeýin 2,6 paıyzǵa deıin shekteýge múmkindik berdi. Ekonomıkanyń negizgi salalary - ekonomıkanyń ornyqty ósýiniń basty faktory boldy. Taýarlar óndirisiniń kólemi 2 paıyzǵa ósti», - dedi Úkimet basshysy.
Onyń aıtýynsha, ekonomıkanyń belsendiliginiń negizin - qurylys salasyndaǵy 11,2 paıyzǵa ósim, aýyl sharýashylyǵyndaǵy 5,6 paıyz jáne óńdeý ónerkásibindegi 3,9 paıyzǵa ósim qurady. Paıdalanýǵa berilgen turǵyn úı kólemi 16,8 paıyzǵa ósip, 15,3 mln sharshy metrge jetti. Óńdeý ónerkásibindegi - ósim mashına jasaýdaǵy 16 paıyz, onyń ishinde avtomobıl jasaýda 53 paıyz, farmatsevtıkada 47 paıyz, metallýrgııada 2,6 jáne jeńil ónerkásiptegi 15 paıyz ósim esebinen qamtamasyz etildi. Degenmen, OPEK+ kelisimderin oryndaý qajettiligine baılanysty taý-ken óndirý ónerkásibiniń damý serpini shekteýli boldy.
«Negizgi kapıtalǵa ınvestıtsııalar taý-ken óndirý ónerkásibin qospaǵanda 14,8 paıyzǵa ósti. Sonymen birge, negizgi kapıtalǵa salynǵan ınvestıtsııalardyń jalpy kólemi ótken jyly 3,4-ke qysqardy. Bul OPEK+ kelisimin oryndaý aıasynda munaı óndirý kóleminiń qysqarýynyń jáne munaıdyń álemdik baǵalarynyń tómendeýi saldarynan elimizdiń munaı-gaz salasynyń 3 iri jobasy - Qashaǵan, TShO jáne Qarashyǵanaq boıynsha ınvestıtsııalardyń qysqarýyna baılanysty bolyp otyr. Qyzmet kórsetý sektory karantın shekteýi sharalarynyń engizilýine baılanysty 5,6 paıyzǵa tómendedi», - dedi ol.
Úkimet basshysynyń dereginshe, jyldyq ınflıatsııa 7,5 paıyzdy qurady. Jumyssyzdyqtyń 5 paıyz deńgeıinde saqtalýy qamtamasyz etildi. Bul Jumyspen qamtýdyń jol kartasyn jáne daǵdarysqa qarsy qabyldanǵan sharalardyń tıimdi iske asyrylýynyń nátıjesinde boldy.
«Jetekshi halyqaralyq kredıttik agenttikter jáne halyqaralyq valıýta qory men Dúnıejúzilik bank ulttyq ekonomıkanyń ornyqty ekenin atap ótti», - dedi Asqar Mamın.