2020 jyly Túrkistan oblysynda medıtsına salasyn qarjylandyrý deńgeıi artady

TÚRKІSTAN. QazAqparat – Túrkistan oblysynyń turǵyndaryna jappaı MÁMS júıesi túsindirilip jatyr. Sala mamandary Arys qalasy men Otyrar aýdanynyń turǵyndaryna saqtandyrý júıesi engizilgennen keıin emdeý tártibi qalaı ózgeretinin aıtyp berdi, dep habarlaıdy QazAqparat tilshisi.

«Áleýmettik medıtsınalyq saqtandyrý qory» KEAQ Túrkistan oblasy boıynsha fılıalynyń dırektory Ashat Beısenbaevtyń aıtýynsha, memleket densaýlyq saqtaý salasyna ıaǵnı, halyqqa kórsetiletin tegin medıtsınalyq qyzmetterge jyl saıyn bir trıllıon teńgege jýyq qarjy bóledi. Qarjylandyrý kólemi jyl saıyn artyp keledi. Deıturǵanmen, densaýlyq saqtaýǵa jumsalǵan shyǵyndardyń 42% halyqtyń qaltasynan shyqqan. Bul tegin medıtsınalyq kómekke bólinetin qarjynyń jetispeýinen týyndaǵan jaǵdaı. Munyń otbasy bıýdjetine edáýir salmaq túsiretini daýsyz. Jańa júıe osy shyǵyndardyń belgili bir bóligin saqtandyrý esebinen jabýǵa múmkindik beredi.

«Medıtsınalyq qyzmettiń mynadaı túrlerin qarjylandyrý deńgeıi konsýltatıvtik-dıagnostıkalyq kómek 5,9 esege, qalpyna keltirý jáne medıtsınalyq ońaltý qyzmeti 6,9 esege, statsıonardy almastyratyn kómek 1,6 esege, bastapqy medıtsınalyq-sanıtarlyq kómek 1,2 esege artady. 2020 jyly oblystaǵy medıtsına salasyn qarjylandyrý deńgeıi artady. Aǵymdaǵy jylǵa bekitilgen bıýdjet 76,8 mlrd teńge bolsa, 2020 jylǵa 99,1 mlrd teńge bólý josparlanǵan. Onyń 65,3 mlrd teńgesi kepildendirilgen tegin medıtsınalyq kómek paketine, 33,8 mlrd teńgesi MÁMS paketine jumsalady», - deıdi Ashat Beısenbaev.

Sala mamandarynyń sózinshe, keler jyly medıtsınalyq saqtandyrý júıesine jarna qazaqstandyqtardyń jeke tabysynan túsedi. Bul aqsha búkil el boıynsha myńdaǵan naýqasqa tegin dıagnostıka men laıyqty em alýǵa kómektesedi. Demek, elimizdegi kenjelep qalǵan medıtsınalyq ońaltý, qalpyna keltirý kómekteri joǵary tarıftermen keń aýqymda kórsetiledi. MÁMS – naýqasqa jınalǵan qaıyrymdylyq emes, kerisinshe turǵyndardy jappaı emdeýge múmkindik beretin ortaq júıe bolmaq.

Kezdesýde mamandar jurtshylyqqa jańa júıeniń artyqshylyqtary men tıimdi tustaryn atap ótti.

«Elimizde qazirgi densaýlyq saqtaý júıesimen salystyrǵanda kóptegen artyqshylyqtary bar. Mindetti áleýmettik medıtsınalyq saqtandyrý júıesi júzege asqan soń, medıtsınalyq qyzmetterdiń sapasy aıtarlyqtaı jaqsarady. Emdeý mekemeleriniń arasynda básekelestik artady, ár adam ózine unaǵan dárigerdi nemese emhanany tańdaý múmkindigine ıe bolady»,- deıdi Túrkistan qalalyq emhanasynyń bas dárigeri Janar Ospanova.