2020 jyly Pavlodar oblysy aýyldarynyń 60 paıyzy taza aýyz sýmen qamtylady
Oblys ákimi Bolat Baqaýovtyń basshylyǵymen ótken apparattyq keńeste esep bergen óńirlik jer qoınaýyn paıdalaný, qorshaǵan orta jáne sý resýrstary basqarmasynyń basshysy Qadyljan Sátıev óńirimizdegi aýyldyq eldi mekenderdi sýmen qamtamasyz etýdi damytý jaıymen tanystyrdy. 2016-2018 jyldary jalpy uzyndyǵy 555 shaqyrym sý qubyrlary salyndy.
- Atalǵan jumys nátıjesinde aýyldyq eldi mekenderdiń ortalyqtandyrylǵan sý jelisine qosylý kórsetkishi 19,4-ten 29,7 paıyzǵa artty, - dep habarlady Qadyljan Sátıev. - Osy baǵyttaǵy 52 jobany júzege asyrý maqsatynda 2019 jyly 13 mıllıard teńge bólindi. Onyń ishinde 10,4 mıllıard teńge - respýblıkalyq bıýdjetten, qalǵan 2,6 mıllıard teńgesi - oblystyq bıýdjetten bólindi.
Qadyljan Sátıev aıtyp ótkendeı, jyl sońyna deıin 39 joba aıaqtalady, nátıjesinde sapaly aýyz sýǵa qol jetkizgen aýyl turǵyndarynyń sany 35 myń adamǵa arttyryp, sý qubyrlaryna qosylǵan aýyldardyń úles salmaǵyn 39,9 paıyzǵa jetedi. Búgingi tańda oblys kóleminde 105 aýyldyq eldi meken ortalyqtandyrlynǵan sý qubyrlaryna qosylǵan. Sapaly aýyz sýǵa qoly jetken aýyl halqynyń sany 135 myńǵa jetip otyr. Bul - óńirimizde turatyn aýyldyqtardyń 65 paıyzy. Ortalyqtandyrylǵan jelilerden sý alatyn aýyldyqtardyń sandyq kórsetkishteri boıynsha Tereńkól aýdany aldynǵy orynda. Atalǵan aýdanda turǵyndardyń 82,3 paıyzy sapaly aýyz sýǵa qoly jetkizgen. Úzdik úshtikke 76,8 paıyz kórsetkishimen Jelezın jáne 74,7 paıyz kórsetkishimen Ertis aýdany endi.
Óńir basshysy Bolat Baqaýov qubyrlardyń iske qosylǵanynan keıin olardyń kimge tıesili bolǵanyn, qalaı paıdalanylyp jatqanyn jáne sýdyń qandaı tarıfter boıynsha satylatynyn jiti nazarda ustaý qajettiligine erekshe toqtaldy.
- Keıbir aýyldarda 2017 jyly iske qosylǵan sý qubyrlarynyń nebary 70 paıyzy úılerge jetkizildi, - dedi Bolat Baqaýov. - Ákimder qurylys jumystarynyń tolyq aıaqtalǵanyn kútip, bir jyldan soń ǵana úılerdi qubyrlarǵa qosady. Adamdarǵa sý kerek bolsa, qurylys jumystarymen qatar ony úılerge de jetkizýge bolady emes pe.
Bolat Baqaýov mysal retinde Aqtoǵaı aýdanyn atady. Onda ekinshi kezeń boıynsha 1121 aýlanyń nebary 232-si ortalyqtandyrylǵan sý júıesine qosylǵan.
- Qaraoba aýylynda birde-bir nysan sý jelilerine qosylmaǵan, - dedi Bolat Baqaýov. - Ýspen aýdanynda Konstantınovkada 662 mıllıon teńgelik jumystar atqaryldy. Búginde 325 aýlanyń 201-i ǵana qubyrǵa qosylǵan. Bul 62 paıyz. Aqqýly aýdany ıAmyshevo aýylynda bul kórsetkish 55 paıyz. Sonda sizderge sý kerek emes pe?!