2020 jyly onlaın baqylaý-kassa mashınalary jappaı paıdalanylady
«Memleket basshysynyń ınvestıtsııalyq tartymdylyqty arttyrý jónindegi tapsyrmasyn iske asyrý maqsatynda «Astana - jańa qala» arnaıy ekonomıkalyq aımaǵynyń qatysýshylary arasynda ónimdi ótkizý kezinde aınalymdardy QQS-tan bosatý usynylady. Sondaı-aq arnaıy ekonomıkalyq aımaq aýmaǵynda taýarlardy ótkizý kezinde QQS-tyń nóldik mólsherlemesin qoldanýdy tańdaý quqyǵy beriledi. Salyqtyq ákimshilendirý aıasynda «Vırtýaldy qoıma» modýli jáne «Elektrondyq shot-faktýralar» aqparattyq júıesi engizilýde. Munymen qosa, onlaın baqylaý-kassa mashınalaryn barlyq jerde paıdalanýdyń merzimin 2024 jyldan 2020 jylǵa aýystyrý kózdeledi», - dedi Tımýr Súleımenov.
Elektrondyq saýdany damytý úshin: deklaratsııa retinde poshta qujattaryn paıdalaný arqyly kedendik deklaratsııalaýdy ońaılatýǵa; elektrondyq kommertsııa uǵymyn engizýge jáne elektrondyq saýda sýbektileriniń arajigin ajyratýǵa; kóliktik-logıstıkalyq ınfraqurylymdy damytýǵa; tutynýshylardyń quqyqtaryn qorǵaýdyń ashyq jáne tıimdi júıesin engizýge baǵyttalǵan túzetýler toptamasy kózdeledi.
Zań jobasy aıasynda taýar bırjalaryn jetildirý boıynsha normalar da qarastyrylyp otyr. Naryqtyq baǵa, taza básekelestik jáne bıznes sýbektileriniń saýda bırjasyna erkin qol jetkizýi esebinen qalyptastyrylǵan baǵa uǵymy engizildi. Tıimsiz deldaldar men dılerlerdi lıtsenzııalaý ınstıtýty bolmaıdy. Bul rette bırjalarda akkredıtatsııalaý ınstıtýtyn saqtaý jáne kásiptik ózin ózi retteý esebinen bıznes-qoǵamdastyqtyń óziniń jaýapkershiligi kúsheıedi.
«Zań jobasynda agroónerkásip sektoryndaǵy saýda-sattyq máselelerine kóńil bólingen. Otandyq óndirýshilerdiń saýda-sattyq jelilerine qol jetkizýin jaqsartý maqsatynda zań jobasynda áleýmettik mańyzy bar taýarlardy satýǵa retro-bonýstar belgileýge tyıym salýlar kózdelgen. Turaqtandyrý qorlarynyń qyzmetine kóbirek ıkemdilik engizý boıynsha normalar engiziledi», -dedi mınıstr.
Azyq-túlik taýarlaryn saqtaý, suryptaý, satý men jetkizýdiń zamanaýı ınfraqurylymyn qurý úshin de quqyqtyq negizdemeler qarastyrylyp otyr. Sondaı-aq kóleńkeli ekonomıkany qysqartý jáne kontrafaktili ónimmen kúres maqsatynda zań jobasynda taýarlardy tańbalaý men baqylap otyrý jónindegi normalar kózdelgen.
Talqylaýdan keıin palata depýtattary «Qazaqstan Respýblıkasynyń keıbir zańnamalyq aktilerine bıznes-ortany damytý jáne saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
Zań jobasynda 38 zańnamalyq aktige shamamen 300 túzetý kózdelýde jáne ol jalpy alǵanda 2 bloktan turady. Birinshi blok «Doing business» halyqaralyq reıtınginde Qazaqstannyń pozıtsııasyn odan ári jaqsartýǵa baǵyttalǵan. Ekinshi blok elektrondyq jáne bırjalyq saýdany, agroónerkásiptik keshendegi ishki saýdany retteýdi jetildirýdi, sondaı-aq syrtqy saýda qyzmetin retteý máselelerinde ulttyq zańnamany úndestirýdi kózdeıdi.