2020 jyly oblıgatsııalar qandaı kólemde bolady

NUR-SULTAN. QazAqparat – 2020 jyly Ulttyq bank Qarjy mınıstrligimen memlekettik baǵaly qaǵazdar naryǵyn sapaly damytý boıynsha ózara is-qımyldy jalǵastyrady. Bul týraly Úkimettiń keńeıtilgen otyrysynda QR Ulttyq bank tóraǵasy Erbolat Dosaev málim etti, dep habarlaıdy QazAqparat tilshisi.

«Qarjy mınıstrligimen memlekettik baǵaly qaǵazdar naryǵyn sapaly damytý, onyń ótimdiligin arttyrý, Qazaqstannyń memlekettik baǵaly qaǵazdaryn damýshy elderdiń halyqaralyq ındeksterine qosý boıynsha belsendi ózara is-qımyl jalǵasady. Bul óz kezeginde syrtqy ınvestorlar tarapynan memlekettik baǵaly qaǵazdarǵa suranysty arttyrady. Ulttyq Bank 1 jylǵa deıingi qysqa merzimdi nottardy shyǵarýdy, al Qarjy mınıstrligi – orta jáne uzaq merzimdi oblıgatsııalardy usynýdy qamtamasyz etedi», - dedi E. Dosaev.

Onyń sózine qaraǵanda, Qarjy mınıstrligine portfeldik ınvestorlardy keńinen tartý úshin oblıgatsııalardyń úlesin 2 jyldan 5 jylǵa deıin arttyrý usynylady. Investıtsııalyq kapıtaldy tartý talaptaryn jaqsartý úshin Ulttyq Bank Qarjylyq retteý agenttigimen birlesip qarjy quraldarynyń naryǵyn damytý jumysyn kúsheıtedi.

Taratylǵan málimetke qaraǵanda, 2020 jylǵa Qarjy mınıstrligi 2 jyldan 10 jylǵa deıingi merzimge 435 mlrd teńge kóleminde jáne 10 jyldan 20 jylǵa deıingi merzimge 1234 mlrd teńge kóleminde oblıgatsııa shyǵarýdy josparlap otyr.