2020 jyly Nur-Sultanda baspana salý kólemi 3 ese artady – ákim

NUR-SULTAN. QazAqparat – Kelesi jyly bas qalada qoljetimdi baspananyń kólemi 3 esege deıin artady. Bul týraly qala ákimi Altaı Kólginov málim etti, dep habarlaıdy QazAqparat tilshisi.

«Elordada jyl saıyn 2 mln sharshy metrden astam turǵyn úı salynady. Onyń 80 paıyzy jeke ınvestıtsııa esebinen turǵyzylýda. Demek, elimizde bıznes durys jolǵa qoıylǵan, ınvestıtsııa tartý jumysy qarqyndy júrip jatyr degen sóz. Árıne, memleket te áleýmettik qoldaý men qorǵaýdy umytpaıdy. Mysaly búgingi baspanaly bolyp otyrǵan jandardyń arasynda barlyq áleýmettik sala ókilderi bar. Onyń ishinde kópbalaly jáne az qamtylǵan otbasylar, asyraýshysyz qalǵan balalar men jasóspirimder, múgedek jandar jáne taǵy basqalar. Bir jaǵynan, bári birden bola salmaıdy, ol úshin ýaqyt kerek. Sebebi elordanyń halqy jyl sanap artyp keledi. Halyq sany artqan saıyn, árıne, baspanaǵa, balabaqshaǵa, mektep pen aýrýhanaǵa suranys arta túsedi. Árıne, onyń bárimen az ýaqyttyń ishinde tolyq qamtý múmkin emes. Kelesi jyldan bastap QR Prezıdenti Qasym-Jomart Toqaevtyń tapsyrmasyna sáıkes, elordada qoljetimdi baspana salý kólemin 3 ese arttyramyz», - dedi A. Kólginov.

Buǵan deıin habarlaǵanymyzdaı, búgin qala ákimi elordalyq 419 otbasyǵa páter kiltterin tabys etti.