2020 jyly múmkindigi shekteýli azamattardy qoldaıtyn portal iske qosylady

TÚRKІSTAN. QazAqparat - Túrkistan oblysynda múmkindigi shekteýli azamattardy qoldaý ońtaılandyrylady. Bul týraly óńirlik kommýnıkatsııalar qyzmetinde ótken brıfıngte oblystyq Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva aıtty, dep habarlaıdy QazAqparat tilshisi.

Ásııa Temirbaevanyń sózinshe, búginde oblysta 93 myń múmkindigi shekteýli azamat esepte tur. Kelesi 2020 jyldan bastap múgedektigi bar azamattardy qoldaý sharalary áleýmettik qyzmetter portalyn engizý arqyly júrgiziletin bolady.

«Bizdiń negizgi maqsatymyz – olardy belsendi qoǵam ómirine tartý. Osy maqsatta múgedektigi bar azamattarǵa áleýmettik qorǵaýdyń jáne qoldaýdyń keshendi sharalary qarastyrylyp otyr. Onyń ishinde járdemaqylardyń 4 túri, qyzmetter men ońaltý quraldaryn, sanatorıı-kýrorttyq emdeýdi, jeke kómekshi men ymdaý tili mamanynyń qyzmetterin usyný», - dedi Ásııa Quralqyzy.

Basqarma basshysynyń aıtýynsha, atalǵan máseleler aldaǵy ýaqytta áleýmettik qyzmetter Portalyn engizý arqyly sheshiletin bolady. Portal ońaltý quraldary men qyzmetterdi memlekettik satyp alý merzimderin qysqartýǵa jáne olardyń sapasyn arttyrýǵa baǵyttalǵan. Portaldy engizý nátıjesinde taýarlarǵa úlken tańdaý, ońaltý quraldary men qyzmetter naryǵyna teńdeı qoljetimdik qamtamasyz etilmek. Memlekettik qyzmetterdiń sapasy ósedi jáne sybaılas jemqorlyq táýekelderin týdyrmaıdy.

«2020 jyldan bastap 5 bıznes-protsestiń 2 túrin portalǵa aýystyrý josparlanyp otyr. Olar: arnaýly áleýmettik qyzmetter jáne 55 tehnıkalyq ońaltý quraldarynyń ishinen 24 túrimen qamtamasyz etý. 2020 jyldyń kókteminen bastap qyzmetterdiń qalǵan 3 bıznes-protsessin Portal arqyly alý múmkindikteri qarastyrylýda», - dedi Ásııa Temirbaeva.