2020 jyly Qazaqstanda 31,3 mln tonna munaı óndirildi

NUR-SULTAN. QazAqparat - Jyl basynan beri Qazaqstanda 31,3 mln tonna munaı óndirildi. Bul týraly QR Energetıka mınıstri Nurlan Noǵaev Úkimet otyrysynda baıandady, dep habarlaıdy QazAqparat tilshisi.

«2020 jyldyń qańtar-sáýir aılarynda munaı men kondensat óndirisi 31,3 mln tonnany qurady. 2019 jyldyń sáıkes kezeńimen salystyrǵanda 6% ósim bar. Onyń ishinde Teńiz Shevroıl - 4,1%, Qashaǵan - 11,5% syndy iri munaı óndirýshi kásiporyndarda ónim artqan. Qarashyǵanaqtaǵy ónim kólemi ózgerissiz qaldy», - dedi spıker qańtar-sáýirdegi áleýmettik-ekonomıkalyq damý qorytyndylary týraly Úkimet otyrysynda.

Onyń aıtýynsha, 5,2 mln tonna munaı óńdeýden ótip, jospardyń 96,3% quraǵan.

«Munaı eksporty 25,3 mln tonnany qurady, bul - jospardyń 115 paıyzy. 20,2 mlrd tekshe metr gaz ben 1,099 mln tonna suıytylǵan gaz óndirildi. 5,6 mlrd tekshe metr tabıǵı gaz eksporttaldy. Bul kórsetkish jospardyń 93 paıyzyn quraıdy. Onyń sebebi Qytaıdaǵy tutynýshylardan koronavırýs pandemııasynda suranystyń azaıýymen baılanysty», - dedi mınıstr.

Sonymen birge, Nurlan Noǵaev barlyq óńirlerde jylytý maýsymynyń aıaqtalǵanyn, tutas maýsymnyń tehnogendi apatsyz ótkenin habarlady.