2020 jyly Qazaqstanda 15,3 mıllıon sharshy metr turǵyn úı salyndy

NUR-SULTAN. QazAqparat - 2020 jyly Biryńǵaı turǵyn úı saıasatyn júzege asyrý jónindegi baǵdarlamanyń aıasynda barlyq qarjylandyrý kózderinen 15,3 mln. sharshy metr turǵyn úı salanyp, 2019 jylǵy kórsetkishten 16,8% artty.

Bul týraly QazAqparat QR Indýstrııa jáne ınfraqurylymdyq damý mınıstrliginiń resmı saıtyna silteme jasap habarlaıdy.

Saıttaǵy málimetterge qaraǵanda, jyl qorytyndysy boıynsha respýblıkada barlyǵy 140 336 turǵyn úı paıdalanýǵa berildi (onyń 41 193 jeke úı), bul ótken jylmen salystyrǵanda sandyq ósimi boıynsha 21,8% qurady.

Ótken jylmen salystyrǵanda turǵyn úıdi paıdalanýǵa berý kóleminiń ósýi 15 aımaqta baıqalady:

Qaraǵandy ​​(125,8%), Soltústik Qazaqstan (122,4%), Jambyl (121,7%), Shyǵys Qazaqstan (119%), Túrkistan (118,6%), Qostanaı (113,1%), Pavlodar (112,1%), Batys Qazaqstan (109,1%), Aqmola (107,4%), Almaty (106,9%), Aqtóbe (101,8%), Mańǵystaý (101,5%) oblystary jáne Nur-Sultan (172,6%), Shymkent (123,9%) jáne Almaty (114,2%) qalalary.

«Nurly jer» turǵyn úı-kommýnaldyq damýynyń memlekettik baǵdarlamasy aıasynda turǵyn úı máselelerin sheshý jáne turǵyndardyń ómir súrýine qolaıly jaǵdaılar jasaý boıynsha keshendi jumystar júrgizilýde. Onyń maqsaty turǵyn úıdiń qol jetimdiligi men jaılylyǵyn arttyrý jáne turǵyn úı ınfraqurylymyn damytý.

Baǵdarlamany iske asyrý jeke ınvestıtsııalardy tartýdy yntalandyrǵanyn atap ótken jón. Jyl qorytyndysy boıynsha 1 teńge memlekettik qarajatqa 4 teńge jeke ınvestıtsııa tartyldy.

2020 jyly turǵyn úı qurylysyna shamamen 2 trıllıon teńgeni quraıtyn ınvestıtsııa tartylyp, 2019 jylǵy deńgeıden 33,6% artty.