2020 jyly qandaı joldar aqyly bolady

NUR-SULTAN. QazAqparat – Kelesi jyly Qazaqstanda taǵy tórt avtotrassa aqyly negizge kóshiriledi. Bul týraly PrimeMinister.kz-ke bergen suhbatynda Indýstrııa jáne ınfraqurylymdyq damý mınıstrligi Avtomobıl joldary komıtetiniń tóraǵasy Saıranbek Barmaqov aıtty, dep habarlaıdy QazAqparat.

S.Barmaqovtyń aıtýynsha, búginde elimizde 682 shaqyrym avtojol — aqyly. Bular — «Nur-Sultan – Temirtaý», «Nur-Sultan – Şýchınsk», «Almaty – Qorǵas» jáne A»lmaty – Qapshaǵaı» baǵyttary.

«Aqyly joldan túsken aqsha tolyǵymen osy joldardy qamtamasyz etýge jumsalady. Buryn olardy qamtýǵa respýblıkalyq bıýdjetten qarajat bólinetin. Jyl basynan beri biz osy tórt aqyly joldan 4 mlrd 130 mln teńge jınadyq», — dedi komıtet tóraǵasy.

Sonymen qatar ol qazirgi ýaqytta respýblıkalyq mańyzy bar avtomobıl joldarynyń 11 myń shaqyrymyn aqyly etý máselesi qarastyrylyp jatqanyn aıtty. Onyń ishinde 2020 jyly — 5,9 myń shaqyrymynda, 2023 jylǵa deıin qalǵan 5 myń shaqyrymynda aqyly júıeni engizý josparlanǵan.

Osy jyldyń shildesinde «QazAvtoJol» UK» AQ aqyly júıeni engizýge ınvestıtsııalyq konkýrs jarııalady. Jyl sońyna deıin konkýrs qorytyndysyn shyǵaryp, ınvestormen kelisim jasasý kózdelgen.

Komıtet basshysy atap ótkendeı, 2020 jyly «Batys Eýropa – Batys Qytaı» dálizi, «Şýchınsk – Petropavl» jol ýchaskesi, «Omby – Pavlodar» jáne «Nur-Sultan – Qostanaı – RF shekarasyna deıingi jol» aqyly bolady.

«Aldyn ala esepteýler boıynsha, aqyly joldardan alymdar jylyna 40 mlrd teńgeni quraıtyn bolady. Bul avtomobıl joldarynyń ózin-ózi qamtýǵa kóshýge múmkindik berip, ınvestordyń tólemaqy alý júıesin engizýge jumsaǵan shyǵynyn jabýdy qamtamasyz etedi. Osylaısha, joba ózin-ózi aqtaıtyn bolady jáne memlekettik bıýdjetke salmaq túsirmeıdi», - dedi ol.

Aıta keteıik, búgingi Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aqyly joldardan jyl saıyn jınalatyn qarjy 4 mlrd teńgeden asqanyn málim etken bolatyn.