2020 jyly ınternet-dúkenderdiń qyzmetine 700-ge jýyq shaǵym túsken
Byltyr eldegi ınternet-dúkender turǵyndarǵa 13,2 mln teńge qaıtaryp bergen. Olardyń bulaı etýine Tutynýshylar komıtetine kelip túsken shaǵymdar túrtki bolǵan. Saýda jáne ıntegratsııa mınıstri Baqyt Sultanov depýtattyq saýalǵa bergen jaýabynda osyndaı málimetter keltirgen.
«2020 jyly Tutynýshylardyń quqyǵyn qorǵaý komıtetine onlaın-dúkenderdiń qyzmeti týraly 689 shaǵym kelip tústi. Qabyldanǵan sharalardyń qorytyndysy boıynsha azamattarǵa 13,2 mln. teńge qaıtaryldy. 2021 jyldyń basynan 104 shaǵym kelip tústi, qaıtarý somasy – 192 myń teńge», - deıdi Baqyt Sultanov.
Mınıstrdiń málimeti boıynsha, elektrondyq saýda salasyndaǵy shaǵymdardyń kóbi memlekettik kirister organdarynda tirkelýden jaltaratyn uıymdarǵa qatysty bolǵan. Áleýmettik jelilerde ǵana tirkelgen ınternet-dúkender, olx, satu, market sııaqty saýda alańdarynan alǵan taýardy aıyrbastaý nemese qaıtarý múmkin bolmaǵanyn aıtyp shaǵymdanýshylar kóp bolǵan. Jetkizilgen taýardyń sapasy jarnamasyndaǵydaı bolmaı shyǵatyn jaıttar da tirkelgen. Óıtkeni kóp jaǵdaıda tutynýshylardyń taýar sapasyn qunyn tólemeı turyp tekserýge múmkindigi joq. Sondaı-aq, taýardyń tıisti japsyrmalar men zattańbalarsyz, taýardy satyp alý faktisin rastaıtyn qujatsyz jiberilýi, satýshy taraptyń meken-jaıy men baılanys nómirlerin kórsetpeýi, taýar sapasyn rastaıtyn qujattardy talap etý múmkindiginiń bolmaýy, jetkizý merziminiń buzylýy, tańdaý aıasynyń tarlyǵy, taýarlardyń belgili bir spektrin ǵana tańý, alaıaqtyq, 100% aldyn ala tólemdi talap ete otyryp, tólem jasaǵannan keıin habarsyz ketý sııaqty keleńsiz oqıǵalar tirkelipti.
«Satýshylar 100% aldyn-ala tólemdi talap ete otyryp, tutynýshylarǵa keri baılanyssyz jáne satýshy týraly senimdi aqparatsyz sapasyz taýarlardy jibergen jaıttar da azamattardyń shaymdanýyna túrtki bolǵan», - dedi mınıstr óz jaýabynda.