2020 jyly «Erekshe adamdar» jobasy bastalady

NUR-SULTAN. QazAqparat - Kelesi jyly «Rýhanı jańǵyrý» Qazaqstan qoǵamdyq damý ınstıtýty bastamasymen «Erekshe adamdar» jobasy bastalmaq, dep habarlaıdy pavlodarnews.kz.

Pavlodar oblysy boıynsha «Rýhanı jańǵyrý» baǵdarlamasyn iske asyrý bóliminiń basshysy Núrııa Kýbenova jerlesterin jobaǵa belsendi qatysýǵa shaqyrady.

«Jobaǵa óziniń qyzmet salasyna qaramastan kez-kelgen azamat qatysa alady. Biz ulttyq mádenıetti, ádebıetti, ónerdi, qolónerdi, halyqtyń salt-dástúrin nasıhattaıtyn adamdar týraly oqıǵalarmen tanys bolýǵa qýanyshtymyz, - deıdi Núrııa Kýbenova.

Qatysýshylardyń jas ereksheligi boıynsha shekteý joq. Ruh.kz respýblıkalyq portalynda, ómiri qyzyqtyrǵan, kishkentaı, tipti, úlken sensatsııa jasaǵan keıipkerler týraly materıaldar jarııalanatyn bolady.

«Erekshe adamdar» aıdaryna qoıylatyn talaptar joǵaryda aıtylǵan qundylyqtardy dáripteıtin, Otany úshin qyzmet etip júrgen adam bolýy qajet. Sondaı-aq, óziniń ereksheligin tolyq sıpattaıtyn naqty materıaldar jiberilýi kerek. Aqparattyń ishinde tulǵanyń tolyq aty-jóni, týǵan jeri men mekenjaıy, ereksheligi kórsetiledi. Materıal TimesNewRoman shrıftindegi 14-ólshemmen jazylyp, fotosýretter JPEG formatynda (20 danadan kem emes) berilýi tıis. Bul aıdardy Ruh.kz portalynda jarııalaý merzimi qosymsha habarlanady.

Aıta keterligi, portalda úmitkerdiń biregeıligin tıisti túrde sıpattamaıtyn nemese talaptarǵa sáıkes kelmeıtin materıaldar jarııalanbaıdy. Qatysýshylar ózderi týraly nemese basqa adamdar týraly jınalǵan materıaldardy joba ofısiniń [e-mail] elektrondy poshtasyna «Erekshe adam» taqyrybyn jazyp jibere alady.