2020 jyly densaýlyq saqtaý salasyna bólinetin qarajat 300 mlrd teńgege artady

NUR-SULTAN. QazAqparat – 2020 jyly Qazaqstannyń densaýlyq saqtaý salasyna 1,5 trln teńge bólinedi. Bul týraly Qarjy mınıstriniń birinshi orynbasary Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblıkalyq bıýdjet jobasyn tanystyrý kezinde aıtyp ótti, dep habarlaıdy QazAqparat tilshisi.

«2020-2022 jyldary densaýlyq saqtaý júıesine arnalǵan qarjy kólemi – 4,7 trln teńge. Onyń ishinde 2020 jyly 1,5 trln teńge bólinedi. Bul soma osy jyldyń deńgeıine qaraǵanda 298,5 mlrd teńgege joǵary. Atalǵan ósim negizinen mindetti áleýmettik medıtsınalyq saqtandyrýǵa kóshý jáne medıtsına qyzmetkerleri eńbekaqysynyń ulǵaıýyna baılanysty bolyp otyr», - dedi vıtse-mınıstr.

Berik Sholpanqulov sonymen qatar, múgedektigi bar adamdardy áleýmettik qorǵaýdyń tıimdi júıesin qurý maqsatynda Múgedekter quqyǵyn qamtamasyz etý jáne ómir súrý sapasyn jaqsartý jónindegi is-sharalar jospary ázirlengenin jetkizdi.

«Úsh jyldyq bıýdjette ony iske asyrýǵa 58,2 mlrd teńge, onyń ishinde 2020 jylǵa 18,9 mlrd teńge bólý josparlanǵan», - dedi ol.

Aıta ketsek, búgin Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblıkalyq bıýdjet jobasyn tanystyryp, bilim jáne ǵylym júıesin damytýǵa 2020-2022 jyldary 3,7 trln teńge bólinetinin málim etken bolatyn.