2020 jyly 936 myńnan astam adam AÁK aldy

NUR-SULTAN. QazAqparat -2020 jyldyń qorytyndysy boıynsha 184,7 myń otbasyndaǵy 936,2 myń adamǵa ataýly áleýmettik kómek (budan ári – AÁK) taǵaıyndaldy. Bul maqsatqa bıýdjetten 75,3 mlrd teńge bólindi, dep habarlaıdy QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.

AÁK otbasynyń árbir múshesine jan basyna shaqqandaǵy ortasha tabysy óńirlik eń tómengi kúnkóris deńgeıiniń 70%-ynan tómen azamattarǵa taǵaıyndalady.

Budan basqa, AÁK kórsetýdiń jańa tetigin iske asyrý sheńberinde elimizdiń barlyq óńirinde tabysy az otbasylardyń mektep jasyna deıingi balalaryn kepildik berilgen áleýmettik toptamamen (budan ári – áleýmettik toptama) qamtamasyz etý boıynsha jumys júrgizilýde.

2020 jyldyń qorytyndysy boıynsha AÁK alýshylar qataryndaǵy 1 jastan 6 jasqa deıingi 218,2 myń bala azyq-túlik jáne turmystyq hımııa jıyntyǵy túrinde áleýmettik toptama aldy.

Esterińizge sala keteıik, 119,7 myń otbasyndaǵy 614,3 myńnan astam qazaqstandyqqa 2020 jylǵy IV toqsanda ataýly áleýmettik kómek taǵaıyndaý memlekettik ınstantsııaǵa júginbeı-aq avtomatty túrde uzartyldy.

AÁK alýshylarǵa budan buryn, II jáne III toqsanda TJ rejımi men karantındik shekteý sharalarynyń qoldanylýyna baılanysty kómek taǵaıyndaý uzartylǵan bolatyn.

Sonymen qatar, atalǵan praktıka 2021 jylǵy 1 toqsanda barlyq AÁK alýshylarǵa qoldanyldy. Bul sharalar halyq arasynda vırýstyq ınfektsııanyń taralý qaýpin azaıtýǵa múmkindik beredi.