2020 jyly 570 mlrd teńge bıýdjet qarajaty tıimsiz paıdalanylǵan
«Bıýdjettiń atqarylýyna qatań talap qoıylǵandyqtan, ázirge ıgerý boıynsha jarys júrip jatyr. Biraq sanany nátıje alýǵa qaraı qaıta formattaý áli de oıdaǵydaı iske asyrylmaı otyr. 2020 jyly bólinip, tıimsiz paıdalanylǵan bıýdjet qarajatynyń somasy 570 mlrd teńgeni qurady. Buǵan respýblıkalyq bıýdjetke qarajatty qaıtarý da, qolma-qol aqshany baqylaý shottaryndaǵy qarajat qaldyqtary da kiredi. Sondaı-aq barlyq memlekettik aýdıt organdary, sonyń ishinde daǵdarysqa qarsy resýrstardyń jumsalýy boıynsha anyqtaǵan buzýshylyqtar da bar. Nátıjesinde bul aqsha pandemııanyń saldaryn jeńildetý úshin ýaqytynda jumys istemedi. Tek bul ǵana emes. Sondyqtan biz ótken jyly Ákimshilik quqyq buzýshylyq týraly kodekske ózgerister engizý kezinde memlekettik resýrstardy tıimsiz paıdalanǵany úshin laýazymdy adamdardyń jaýaptylyǵyn kúsheıtý jónindegi bastaǵan jumysty jalǵastyrý óte mańyzdy dep esepteımiz», - dedi Natalıa Godýnova.
Onyń atap ótýinshe, qoldanystaǵy shyǵystardyń sapasy jáne iske asyrýdan alynatyn áser mánine olardy synı turǵydan qaıta qaraý qajettiligi burynnan pisip-jetildi.
«Bul jóninde Memleket basshysy ár sózinde aıtyp otyrady. Bıýdjettiń múmkindikteri shekteýli bolǵan kezde basymdyqtardy naqty aıqyndap, dáıekti túrde belgileý qajet. Bul barlyq josparlanǵan mindettemelerdiń oryndalýyna kepildik beredi jáne qabyldanǵan sheshimderdiń sabaqtastyǵyn qamtamasyz etedi. Memlekettik josparlaýdyń jańa júıesi men ulttyq jobalar buǵan yqpal etedi dep úmittenemiz», - dedi ol.
Komıtet tóraıymy depýtattardyń kórsetken qoldaýynyń jáne Ulttyq ekonomıka mınıstrliginiń belsendi róliniń arqasynda salynǵan bıýdjet qarajatynan alynatyn ekonomıkalyq áserdi baǵalaý negizderi Bıýdjet kodeksinde kózdelgenin basa aıtty.
«Onyń qalaı júzege asyrylatynyn aldaǵy eki jylda kóretin bolamyz. Biraq, Strategııalyq josparlaý jáne reformalar agenttigi men Ulttyq ekonomıka mınıstrliginiń ádisnamalyq úılestirýshi retindegi belsendi ustanymy odan ári de mańyzdy ekeni anyq», - dedi ol.