2020 jylǵy 1 qańtardan 1360 okrýgte bıýdjettiń IV deńgeıi engiziledi

NUR-SULTAN. QazAqparat - 2020 jylǵy 1 qańtardan bastap turǵyndarynyń sany 2 myńǵa jetpeıtin 1360 okrýgte bıýdjettiń IV deńgeıi engiziledi. Bul týraly búgin Senat depýtattarynyń ortalyq atqarýshy jáne jergilikti ókiletti organdardyń basshylarymen kezdesýi barysynda Ulttyq ekonomıka mınıstri Rýslan Dálenov aıtty, dep habarlaıdy QazAqparat tilshisi.

«Bes ınstıtýtsıonaldyq reformany júzege asyrý jónindegi 100 naqty qadam» Ult josparynyń 98-qadamy sheńberinde aýdandyq mańyzy bar qalalar, aýyldar, kentter, aýyldyq okrýgter deńgeıinde jergilikti ózin-ózi basqarýdyń derbes bıýdjetin engizý tapsyryldy. Bul reformanyń maqsaty - jergilikti mańyzy bar máselelerdi sheshýde jergilikti ózin-ózi basqarý organdarynyń qarjylyq jáne ekonomıkalyq táýelsizdigin arttyrý jáne azamattardyń aýyldardy damytýǵa qatysý múmkindikterin keńeıtý. Qazirgi ýaqytta eki kezeńi júzege asyrylyp jatyr. Birinshi kezeńde 2018 jyly halyq sany 2 myńnan asatyn 1062 aýdandyq mańyzy bar qalalarda, aýyldarda, kentterde, aýyldyq okrýgterde bıýdjettiń IV deńgeıi engizildi. 2020 jylǵy 1 qańtardan bastap turǵyndary sany 2 myńnan kem qalǵan 1360 okrýgte engizý josparlanǵan", - dedi mınıstr.

Onyń dereginshe, aýyldyq okrýgterdi bıýdjetpen qamtýdyń eń joǵary deńgeıi Túrkistan oblysynda 96, Almaty oblysynda 74 jáne Jambyl 73 paıyzdy quraıdy. Eń az qamtylǵan Pavlodar, Qaraǵandy jáne Qyzylorda oblystary bolyp otyr.

"2018 jyldyń qorytyndysy boıynsha derbes bıýdjeti bar aýyldyq okrýgterdiń jalpy tabysy 129 mlrd teńgege deıin jetti. Onyń ishinde jeke kirister 32 mlrd teńgeni, transfertter 97 mlrd teńgeni quraıdy. El boıynsha bir aýyldyq okrýgtiń ortasha bıýdjeti 122,4 mln teńge boldy", - dedi R.Dálenov.