2020 jylǵa qaraı jolaýshylar vagonyna tapshylyq 10 myń orynǵa deıin ósýi múmkin - Á. Isekeshev
Eske salaıyq, otyrysta «Qazaqstan Respýblıkasynyń keıbir zańnamalyq aktilerine temirjol jolaýshylar kóligi máseleleri boıynsha ózgerister men tolyqtyrýlar engizý týraly» QR Zańy qabyldanǵan bolatyn.
Mınıstrdiń aıtýyna qaraǵanda, zań jobasymen ınvestıtsııalar tartý esebinen temirjol jolaýshylar vagondary parkiniń tozý deńgeıin tómendetý kózdeledi. Sonymen qatar, áleýmettik mańyzdy qatynastar boıynsha jolaýshylar tasymalyna baǵany memlekettik retteý tetigi jetildiriledi.
«Qazirgi tańda áleýmettik mańyzdy qatynastar boıynsha paıdalanylatyn jolaýshylar vagondary parkiniń tozý deńgeıi 70 paıyzdy quraıdy. Al jolaýshylar parki vagondarynyń jalpylama tozýy 56 paıyz. Sonymen qatar, jolaýshylar vagondarynyń tapshylyǵy 6 myń orynǵa jetti. Eger tıisti sharalar qabyldanbasa, 2020 jylǵa qaraı jolaýshylar vagonyna tapshylyq 10 myń orynǵa deıin ósýi múmkin», - dedi QR Investıtsııalar jáne damý mınıstri Áset Isekeshev. Onyń aıtýynsha, tozýdyń mundaı jaǵdaıǵa jetýine negizgi sebep tasymaldaýdyń shyǵyndylyǵy, vagondar parkin jańǵyrtýǵa kapıtal qamtymdylyǵynyń tómendigi bolyp tabylady.
«Sonymen birge, bul salaǵa jeke ınvestıtsııalar tartýdyń zańnamalyq tetikteri jetilmeı otyr. Qazirgi kúnge deıin vagondar parkin jańartý tek sýbsıdııalaý tetigi arqyly júzege asyp keldi. Bul jylyna shamamen elý vagondy ǵana qurady. Alaıda, bul tozyǵy jetken eski vagondardy almastyrýǵa jetkiliksiz. 2016 jyldan bastap jylyna tozyǵy jetken 150 vagon isten shyǵatyny boljanyp otyr. Osyǵan baılanysty, zańnama aıasynda bir tasymaldaýshynyń óz baǵytynda uzaq ýaqyt qyzmet kórsetýin bekitý usynylady. Qazir bul merzim bir jyl bolsa ony 10 jylǵa uzartýdy qarastyramyz. Sondaı-aq uzaq merzimge jolaýshylardy tasymaldaýdyń negizgi jaǵdaılary, atap aıtqanda, tasymaldaý marshrýty, baǵa saıasaty, jumystar men qyzmetterdiń kólemi men quny anyqtalady», - dedi mınıstr.