2020 jylǵa qaraı Qazaqstan arqyly ótetin tranzıt kólemi 2 ese artady - J. Qasymbek

ASTANA. QazAqparat - 2020 jylǵa qaraı Qazaqstan arqyly ótetin tranzıt kólemi 2 ese artady. Bul týraly búgin Ortalyq kommýnıkatsııalar qyzmetinde ótken brıfıngte QR Investıtsııalar jáne damý mınıstrliginiń birinshi vıtse-mınıstri Jeńis Qasymbek málim etti.

«Qazaqstan 2020 jylǵa qaraı Ortalyq Azııanyń negizgi logıstıkalyq operatory jáne eki alyp naryq arasyndaǵy negizgi tranzıtteýshi bolady dep josparlap otyrmyz. Sol kezde bizdiń elimiz arqyly ótetin tranzıt kólemi 2 ese artady», - dep atap ótti ol.

Birinshi vıtse-mınıstrdiń aıtýynsha, elimizdiń temir jol salasy aldynda 2020 jylǵa aqaraı 6 myń shaqyrymǵa jýyq temirjoldy modernızatsııalaý, ınfraqurylymdy damytý jáne tranzıttik-kóliktik áleýetin arttyrý mindeti tur.

«Bıylǵy 22 tamyzda jalpy uzyndyǵy 1250 shaqyrym Jezqazǵan-Beıneý jáne Arqalyq-Shubarkól temirjol ýchaskeleri ýaqytsha paıdalanýǵa berildi. Osy joldarda 3,5 myń jańa jumys oryndary ashyldy. Qaraǵandy, Qyzylorda, Aqtóbe, Mańǵystaý jáne Qostanaı oblystarynda temirjol boıyna 204 turǵyn úı, 2 mektep jáne 3 balabaqsha salynady, áleýmettik jaǵdaı retteledi», - deıdi J. Qasymbek.

Onyń atap ótýinshe, atalǵan marshrýtta 2018 jylǵa qaraı 24 mln.tonna júk tasymaldanatyn bolady. Al osy kórsetkish 2020 jylǵa qaraı 30 mln. tonnaǵa jetkiziledi.