2020 jylǵa deıin respýblıkalyq mańyzy bar joldardyń 21 390 shaqyrymyna jóndeý júrgiziledi

ALMATY. 8 sáýir. QazAqparat - 2020 jylǵa deıin halyqaralyq 6 kólik dálizin qaıta qurý aıaqtalady. Bul týraly búgin Almatyda «Qazaqstannyń kóliktik ınfraqurylymyn 2020 jylǵa deıingi damytý» baǵdarlamasy jobasynyń qoǵamdyq tyńdaýynda aıtyldy

Kólik jáne kommýnıkatsııa mınıstrliginiń Jaýapty hatshysy Jeńis Qasymbektiń aıtýynsha, baǵdarlamanyń qurylymy úkimette maquldanǵan. Baǵdarlama Qazaqstannyń kólik ınfraqurylymynyń básekelelestik qabileti men tranzıttik áleýetin arttyrýdy kózdeıdi. Bul úshin 2020 jylǵa deıin aýdan ortalyqtarynda jańa 9 avtovokzal, 61 avtobeket, aýyldarda jolaýshylarǵa qyzmet kórsetetin 733 pýnkt, qalalarda 1104 taksı turaǵy salynbaq. Sondaı-aq 134 avtovokzal men 138 avtobeket standartqa sáıkestendirilip, 300 temirjol vokzalyna jóndeý jumystary júrgizilip, 14 áýejaıda qaıta qurý aıaqtalady. Respýblıkalyq mańyzy bar joldardyń 21 390 shaqyrymyna jóndeý júrgiziledi. Onyń 11 390 shaqyrymy qaıta qurý jumystary.